पुरंदर (प्रतिनिधी) – पुरंदर तालुक्यातील खळद परिसरात सापडलेल्या अनोळखी इसमाच्या खून प्रकरणाचा उलगडा करण्यात सासवड पोलिसांना यश आले असून आरोपीला अटक करण्यात आली आहे. चेतन मुगुट मांढरे (वय ३४, रा. मांढर, ता. पुरंदर) असे अटक करण्यात आलेल्या आरोपीचे नाव आहे.
१४ फेब्रुवारी रोजी खळद येथील मोहन ढाब्याच्या शेजारी दगडांच्या ढिगाऱ्यात एक अनोळखी इसम नग्न व अर्धबेशुद्ध अवस्थेत आढळून आला होता. त्याला तातडीने सासवड येथील ग्रामीण रुग्णालयात दाखल करण्यात आले. प्रकृती गंभीर असल्याने पुढील उपचारासाठी पुण्यातील ससून रुग्णालयात हलविण्यात आले. मात्र, २३ फेब्रुवारी रोजी उपचारादरम्यान त्याचा मृत्यू झाला.
तपासादरम्यान मृताची ओळख राकेश उर्फ मिश्रीलाल छोटेलाल (वय ३३, रा. छोलामऊ, उन्नाव पुरवा, उत्तर प्रदेश) अशी पटली. शवविच्छेदन अहवालात डोक्यावरील गंभीर दुखापतीमुळे मृत्यू झाल्याचे स्पष्ट झाल्यानंतर ७ मार्च रोजी सासवड पोलिस ठाण्यात खुनाचा गुन्हा दाखल करण्यात आला.
या प्रकरणाचा तपास करताना पोलिसांनी नातेवाईक, सहकारी तसेच परिसरातील नागरिकांची सखोल चौकशी केली. विशेष पथक स्थापन करून तपास सुरू ठेवण्यात आला. दरम्यान, हवालदार सूरज नांगरे यांना मिळालेल्या गोपनीय माहितीच्या आधारे चेतन मांढरे याचे नाव समोर आले.
त्यानुसार पोलिसांनी आरोपीवर पाळत ठेवत गडहिंग्लज येथून त्याला ताब्यात घेतले, अशी माहिती सासवड पोलिस ठाण्याचे पोलिस निरीक्षक कुमार कदम यांनी दिली.
या घटनेमुळे परिसरात खळबळ उडाली असून पोलिसांच्या तपासामुळे अखेर या गूढ खून प्रकरणाचा उलगडा झाला आहे.
