पुरंदर | प्रतिनिधी
पुरंदर तालुक्यातील निरा कृषी उत्पन्न बाजार समितीच्या सासवड उपबाजारात धान्याची मोठ्या प्रमाणावर आवक झाली असून, बुधवार दि. ६ रोजी ज्वारीला प्रतिक्विंटल कमाल ४ हजार रुपये तर गव्हाला प्रतिक्विंटल ३ हजार २०० रुपयांचा दर मिळाल्याची माहिती बाजार समितीचे सभापती संदीप फडतरे यांनी दिली.
सासवड उपबाजारात वाघापूर, माळशिरस, परिचे, गराडे, दिवे, वाल्हे, राजुरी यांसह पुरंदर, बारामती, दौंड, इंदापूर व भोर तालुक्यातील शेतकरी ज्वारी, बाजरी, गहू, तांदूळ, हरभरा आदी धान्य विक्रीसाठी आणतात.
बाजार समितीचे सचिव मिलिंद जगताप यांनी दिलेल्या माहितीनुसार, एक नंबर प्रतीच्या ज्वारीला प्रतिक्विंटल कमाल ४,००० रुपये, किमान ३,००० रुपये तर सरासरी ३,५०० रुपये दर मिळाला. गव्हाला कमाल ३,२०० रुपये, किमान २,६०० रुपये तर सरासरी २,९०० रुपये प्रतिक्विंटल दर मिळाला.
यावेळी सभापती संदीप फडतरे, उपसभापती बाळासो शिंदे, संचालक शरद जगताप, वामन कामठे, देविदास कामठे, शरयू वाबळे, भाऊसो गुलदगड, पंकज निलाखे, अनिल माने, अशोक निगडे, संचालिका शहजान शेख, लिपिक विकास कांबळे तसेच व्यापारी रूपचंद कांडगे, राजेंद्र जालिंद्रे, अविनाश महाजन, नंदकुमार महाजन, सत्यवान पवार, जितेंद्र महाजन व शैलेश विरकर उपस्थित होते.
दरम्यान, निरा बाजारात गुळाचीही ५५० बॉक्स म्हणजेच ११० क्विंटल इतकी आवक झाली होती. गुळाला प्रतिक्विंटल किमान ४,१०० रुपये, कमाल ४,६०० रुपये तर सरासरी ४,२५० रुपये दर मिळाल्याची माहिती सहसचिव नितीन किकले, कृष्णा खलाटे आणि प्रवीण कर्णवर यांनी दिली. यावेळी गुळ व्यापारी शांतीकुमार कोठडिया उपस्थित होते.
उपबाजारातील प्रमुख धान्य दर (प्रतिक्विंटल):
- ज्वारी : किमान ३,००० | कमाल ४,००० | सरासरी ३,५००
- बाजरी : किमान २,५०० | कमाल ३,३०० | सरासरी २,९००
- गहू : किमान २,६०० | कमाल ३,२०० | सरासरी २,९००
- हरभरा : किमान ४,५०० | कमाल ५,७०० | सरासरी ५,१००
