भडगाव प्रतिनिधी
चाळीसगाव तालुक्यातील बहाळ येथील सुपुत्र तथा सध्या चाळीसगाव येथे वास्तव्यास असलेले कल्पेश विजय महाले यांनी आंतरराष्ट्रीय स्तरावर नेत्रदीपक कामगिरी करत भारताचे नाव उज्ज्वल केले आहे.
दि. ४ मे २०२६ ते ७ मे २०२६ दरम्यान थायलंडमधील बँकॉक येथे आयोजित “भारत विरुद्ध थायलंड इंटरनॅशनल रायफल शूटिंग चॅम्पियनशिप २०२६” स्पर्धेत भारताचे प्रतिनिधित्व करत कल्पेश महाले यांनी पुरुष (मास्टर) ओपन गटात सुवर्णपदक पटकावले.
त्यांच्या या उल्लेखनीय यशामुळे बहाळ गावासह चाळीसगाव परिसरात आनंदाचे वातावरण निर्माण झाले असून विविध स्तरातून त्यांच्यावर अभिनंदनाचा वर्षाव होत आहे.
कल्पेश महाले यांना या स्पर्धेसाठी श्री. लवकुमार जाधव आणि विशाल सोलंकी यांचे मोलाचे मार्गदर्शन लाभले. त्यांच्या मेहनतीला आणि प्रशिक्षकांच्या मार्गदर्शनाला या यशाचे श्रेय दिले जात आहे.
आंतरराष्ट्रीय स्पर्धेत सुवर्णपदक जिंकून कल्पेश महाले यांनी युवा खेळाडूंना प्रेरणा देणारी कामगिरी केली असून, त्यांच्या पुढील वाटचालीसाठी शुभेच्छा व्यक्त करण्यात येत आहेत.
