खटाव प्रतिनिधी :
वडूज येथील कृतिका कमलाकर देशमुख हिने पुणे विद्यापीठाच्या ललित कला केंद्र, गुरुकुलच्या एम.ए. नाटक विभागात सुवर्णपदक प्राप्त करून तालुक्याचे नाव उज्ज्वल केले आहे.
ललित कला केंद्रातील एम.ए. नाटक हा तीन वर्षांचा नाट्य प्रशिक्षण अभ्यासक्रम असून, या अभ्यासक्रमामध्ये नाट्यलेखन, दिग्दर्शन, अभिनय तसेच नाट्यसंबंधित विविध प्रशिक्षण दिले जाते. या अभ्यासक्रमात उल्लेखनीय यश संपादन करत कृतिका देशमुख हिने सुवर्णपदक पटकावले.
पुणे विद्यापीठाचे कुलगुरू डॉ. पराग काळकर तसेच ललित कला केंद्राचे विभागप्रमुख डॉ. प्रवीण भोळे यांच्या हस्ते कृतिका हिला सुवर्णपदक व “रवींद्र पुरस्कार” प्रदान करून सन्मानित करण्यात आले.
कृतिका हिचे प्राथमिक व उच्च माध्यमिक शिक्षण वडूज येथे झाले असून पुढील शिक्षण तिने पुणे येथे पूर्ण केले. ती वडूज येथील किर्लोस्कर इंजिन विक्रेते व विमा प्रतिनिधी कमलाकर देशमुख यांची कन्या आहे.
कृतिका हिच्या या यशाबद्दल सर्व स्तरांतून तिचे अभिनंदन करण्यात येत आहे.
