भडगाव | प्रतिनिधी
कजगाव ते पारोळा रस्त्यावर सुरू असलेल्या संथ गतीतील कामामुळे अपघातांची मालिका सुरूच असून, आज एका ट्रॅक्टरचा अपघात घडला. ट्रॅक्टर अचानक घसरून खोल खड्ड्यात जाऊन पलटी झाला. सुदैवाने कोणतीही जीवितहानी झाली नाही, मात्र वाहनाचे मोठे नुकसान झाले आहे.
रस्त्याचे काम सुरू असताना मोठ्या प्रमाणावर मुरूम व मातीचा भराव टाकून रस्ता उंच करण्यात आला आहे. मात्र रस्त्याच्या कडेला सुरक्षा कठडे किंवा आवश्यक सुरक्षितता व्यवस्था नसल्याने धोकादायक परिस्थिती निर्माण झाली आहे.
पावसाळा जवळ आल्याने हा कच्चा भराव वाहून जाण्याची भीतीही व्यक्त केली जात आहे. स्थानिक नागरिकांनी रस्त्याच्या कामाची गुणवत्ता व सुरक्षिततेबाबत प्रशासनाने तातडीने लक्ष देण्याची मागणी केली आहे.
चालकाचे नियंत्रण सुटल्याने हा अपघात घडल्याचे समोर आले असून, अशा प्रकारच्या घटनांमुळे नागरिकांमध्ये संतापाचे वातावरण निर्माण झाले आहे.
