माळशिरस : प्रतिनिधी
मित्रांसोबत पोहण्यासाठी गेलेल्या पानिव (ता. माळशिरस) येथील युवकाचा नीरा उजवा कालव्यात बुडून दुर्दैवी मृत्यू झाला. आकाश सतीश मदने (वय २२) असे मृत युवकाचे नाव आहे.
मिळालेल्या माहितीनुसार, आकाश मदने व त्याचे चार मित्र बुधवारी दि. ६ मे रोजी दुपारी दोन वाजण्याच्या सुमारास निकमवाडी येथील नीरा उजवा कालवा परिसरात पोहण्यासाठी गेले होते. यावेळी त्यांच्यापैकी एक मित्र पाण्याच्या जोरदार प्रवाहात बुडू लागला. प्रसंगावधान राखत आकाशने तात्काळ पाण्यात उडी घेत मित्राला सुरक्षित बाहेर आणले. मात्र, स्वतःचा जीव धोक्यात घालून मित्राला वाचवणारा आकाश पाण्याच्या प्रवाहात दमल्याने बुडाला.
घटनेची माहिती मिळताच पानिव परिसरातील तसेच आजूबाजूच्या गावांतील ग्रामस्थांनी घटनास्थळी धाव घेत शोधमोहीम सुरू केली. रात्री उशिरापर्यंत शोधकार्य सुरू होते, मात्र आकाशचा शोध लागला नाही. अखेर गुरुवारी सकाळी सुमारे ११ वाजण्याच्या दरम्यान ७७ चौकी परिसरात त्याचा मृतदेह आढळून आला.
आकाशच्या दुर्दैवी निधनामुळे पानिव गावात शोककळा पसरली असून अत्यंत शोकाकुल वातावरणात त्याच्यावर अंत्यसंस्कार करण्यात आले.
