आजरा : प्रतिनिधी
महाराष्ट्र शासनाच्या “माझे गाव आरोग्य संपन्न गाव” अभियानांतर्गत प्राथमिक आरोग्य केंद्र, वाटंगी (ता. आजरा) यांच्या वतीने १६ मे रोजी ‘राष्ट्रीय डेंग्यू दिन’ विविध जनजागृतीपर आणि प्रतिबंधात्मक उपक्रमांनी उत्साहात साजरा करण्यात आला. “एक पाऊल स्वच्छतेकडे, एक पाऊल आरोग्याकडे” हा संदेश देत गावागावांत विशेष डेंग्यू प्रतिबंध मोहीम राबविण्यात आली.
मोहिमेअंतर्गत विविध उपक्रम
आरोग्य विभागाच्या पथकांनी गावात कंटेनर सर्वे आणि घरभेटी घेत पाण्याच्या टाक्या, कुलर, ड्रम, फुलदाण्या तसेच जुन्या टायरची तपासणी केली. ज्या ठिकाणी पाणी साचले होते अशा जागा शोधून डासांची उत्पत्ती रोखण्यासाठी उपाययोजना करण्यात आल्या.
तसेच गावात स्वच्छतेबाबत जनजागृती करत नागरिकांना डेंग्यूपासून बचावासाठी आवश्यक माहिती देण्यात आली.
डेंग्यूची कारणे व लक्षणे
डेंग्यू हा ‘एडिस एजिप्ती’ डासाच्या चाव्यामुळे होणारा संसर्गजन्य आजार आहे. हा डास स्वच्छ साचलेल्या पाण्यात वाढतो. वाढते शहरीकरण, सांडपाण्याची अयोग्य विल्हेवाट आणि परिसरात साचलेले पाणी ही डेंग्यू वाढण्याची प्रमुख कारणे असल्याचे आरोग्य विभागाने सांगितले.
डेंग्यूची प्रमुख लक्षणे:
- अचानक तीव्र ताप
- डोकेदुखी व अंगदुखी
- सांधे आणि स्नायूंमध्ये वेदना
- उलट्या व अंगावर पुरळ
- गंभीर अवस्थेत रक्तस्त्राव
प्रतिबंधासाठी महत्त्वाचे उपाय
मोहिमेदरम्यान “डास हटवा – डेंग्यू रोखा” आणि “स्वच्छ गाव – निरोगी गाव” अशा घोषणांनी परिसर दुमदुमून गेला.
डास नियंत्रणासाठी खालील उपायांवर भर देण्यात आला:
- पाण्यात गप्पी मासे सोडण्याचे प्रात्यक्षिक
- आठवड्यातून एक दिवस ‘ड्राय डे’ पाळणे
- पूर्ण बाह्यांचे कपडे वापरणे
- मच्छरदाणीचा वापर
- ताप आल्यास त्वरित आरोग्य केंद्रात तपासणी
आरोग्य पथकाचा सहभाग
तालुका आरोग्य अधिकारी डॉ. आर. जी. गुरव यांच्या मार्गदर्शनाखाली वैद्यकीय अधिकारी डॉ. एम. ए. शेख, आरोग्य निरीक्षक अतुल पाथरवट, आरोग्य सहाय्यक व सेवकांच्या पथकाने ही मोहीम यशस्वीपणे राबविली.
या मोहिमेला आरोग्य सेविका, आशा स्वयंसेविका, युवक मंडळे आणि ग्रामस्थांचा उत्स्फूर्त प्रतिसाद लाभला. सामूहिक सहभागातून “माझे गाव, डेंग्यूमुक्त गाव” हा संकल्प अधिक दृढ करण्यात आला.
