प्रत्येक रक्तदात्यास हेल्मेट भेट; मानवता आणि सुरक्षेचा संदेश
उदगीर / प्रतिनिधी
उदगीर शहर पोलीस स्टेशन, ग्रामीण पोलीस स्टेशन आणि ग्रामीण पोलीस ठाण्यांच्या वतीने आयोजित भव्य रक्तदान शिबिरात तब्बल २५३ रक्तदात्यांनी सहभाग नोंदवत सामाजिक बांधिलकीचे दर्शन घडवले.
लातूर जिल्ह्याचे पोलीस अधीक्षक सोमय मुंडे आणि अप्पर पोलीस अधीक्षक अमोल तांबे यांच्या संकल्पनेतून आयोजित या शिबिराचे आयोजन उपविभागीय पोलीस अधिकारी गजानन भातलवंडे यांच्या मार्गदर्शनाखाली करण्यात आले.
या रक्तदान शिबिरात पोलीस अधिकारी, कर्मचारी, पत्रकार, पोलीस पाटील, सामाजिक कार्यकर्ते आणि नागरिकांनी उत्स्फूर्त सहभाग घेतला. शहर पोलीस निरीक्षक दिलीप गाठे यांनी स्वतः रक्तदान करून समाजासमोर आदर्श निर्माण केला. त्यांनी सक्षम नागरिकांनी पुढे येऊन रक्तदान करावे, असे आवाहनही यावेळी केले.
शिबिरात रक्तदात्यांना हेल्मेट भेट देण्यात आले. “रक्तदानातून दुसऱ्याचे जीवन वाचवा आणि हेल्मेट वापरून स्वतःचे जीवन सुरक्षित ठेवा,” असा दुहेरी संदेश या उपक्रमातून देण्यात आला.
यावेळी माजी राज्यमंत्री तथा आमदार बनसोडे यांनी मनोगत व्यक्त करत हेल्मेटचे महत्त्व अधोरेखित केले. “हेल्मेटमुळे स्वतःचा जीव सुरक्षित राहतो,” असे ते म्हणाले.
भालचंद्र ब्लड बँकेच्या वैद्यकीय अधिकारी आणि कर्मचारी वर्गानेही या शिबिरात सहकार्य केले.
उदगीर पोलिसांच्या या उपक्रमामुळे समाजाला मानवता, सामाजिक जबाबदारी आणि सुरक्षेचा जिवंत संदेश मिळाल्याची भावना उपस्थितांनी व्यक्त केली.
