जुनी इमारत धोकादायक अवस्थेत; नवीन इमारतीतून कामकाज सुरू करण्याची ग्रामस्थांची मागणी
कोळनूर : प्रतिनिधी
कोळनूर येथील ग्रामपंचायतीच्या नवीन इमारतीचे उद्घाटन अद्याप रखडल्याने ग्रामस्थांमध्ये नाराजी व्यक्त होत आहे. दरम्यान, गावातील जुनी ग्रामपंचायत इमारत अत्यंत जीर्ण व धोकादायक अवस्थेत पोहोचल्याने नागरिकांच्या सुरक्षेचा प्रश्न निर्माण झाला आहे.
गेल्या अनेक वर्षांपासून याच जुन्या इमारतीतून ग्रामपंचायतीचे कामकाज सुरू होते. मात्र आता इमारतीची अवस्था दिवसेंदिवस खालावत असून कोणतीही दुर्घटना घडण्याची शक्यता व्यक्त केली जात आहे. त्यामुळे ग्रामस्थांमध्ये भीतीचे वातावरण निर्माण झाले आहे.
दरम्यान, नवीन ग्रामपंचायत इमारत बांधून पूर्ण झाली असली तरी उद्घाटनाअभावी त्या ठिकाणाहून कामकाज सुरू करण्यात आलेले नाही. त्यामुळे ग्रामस्थांनी प्रशासनाने तातडीने नवीन इमारतीचे उद्घाटन करून ग्रामपंचायतीचे सर्व कामकाज तेथून सुरू करावे, अशी मागणी केली आहे.
नागरिकांच्या सुरक्षिततेचा विचार करून प्रशासनाने या प्रश्नाकडे गांभीर्याने लक्ष द्यावे, अशी अपेक्षा ग्रामस्थांकडून व्यक्त होत आहे.
