जत तालुक्याच्या विकासासाठी महायुती सरकार कटिबद्ध – मान्यवरांचे प्रतिपादन
सांगली प्रतिनिधी :
जत, दि. १६ मे : जत तालुक्याच्या सर्वांगीण विकासाला नवी दिशा देणाऱ्या जत पंचायत समितीच्या नूतन प्रशासकीय इमारतीच्या भव्य भूमिपूजन समारंभास आज मोठ्या जनसमुदायाच्या उपस्थितीत उत्साहपूर्ण वातावरणात संपन्नता लाभली.
यावेळी जत तालुक्याच्या विकासासाठी महायुती सरकार कटिबद्ध असल्याचा निर्धार व्यक्त करण्यात आला. “देवाभाऊ” आणि ग्रामविकास मंत्री ना. जयकुमार भाऊ गोरे यांच्या माध्यमातून जत तालुक्याला विकासाच्या मुख्य प्रवाहात आणण्यासाठी प्रयत्न सुरू असल्याचे मान्यवरांनी सांगितले.
कार्यक्रमात बोलताना मान्यवरांनी सांगितले की, “जत तालुका महाराष्ट्रात नंबर वन बनवायचा असेल तर विकासाची गंगा प्रत्येक गावापर्यंत पोहोचली पाहिजे. ग्रामविकास खात्याच्या माध्यमातून रस्ते, पाणी, शासकीय इमारती आणि मूलभूत सुविधांसाठी मोठ्या प्रमाणावर निधी उपलब्ध झाला असून विकासासाठी कोणतीही कमतरता भासू दिली जाणार नाही.”
“गोपीचंद पडळकर विकासासाठी झटणारे नेतृत्व” – आमदार सदाभाऊ खोत
कार्यक्रमाचे प्रमुख पाहुणे आमदार सदाभाऊ खोत यांनी आपल्या भाषणात आमदार गोपीचंद पडळकर यांच्या कार्याचे कौतुक करताना सांगितले की,
“महाराष्ट्रात मंत्रालयात २४ तास सामान्य जनतेसाठी आणि मतदारसंघाच्या विकासासाठी झटणारा जर एखादा आमदार असेल, तर तो म्हणजे गोपीचंद पडळकर. जत तालुक्याच्या भवितव्यासाठी आणि युवकांच्या उज्ज्वल भविष्यासाठी ते जीवाचे रान करत आहेत.”
“जतच्या विकासासाठी निधीची कमतरता भासू देणार नाही” – जयकुमार गोरे
ग्रामविकास मंत्री ना. जयकुमार भाऊ गोरे यांनी जत तालुक्याच्या विकासासाठी शासन पूर्ण ताकदीने उभे असल्याचे स्पष्ट केले.
“ग्रामविकास खात्याकडे जत तालुक्यासाठी जो कोणताही विकास प्रस्ताव येईल, तो प्राधान्याने मंजूर केला जाईल. निधीची कोणतीही कमतरता पडू दिली जाणार नाही,” असे त्यांनी सांगितले.
यावेळी जत तालुक्यातील जिल्हा परिषद सदस्य, पंचायत समिती सदस्य, जत नगरपरिषदेचे नगराध्यक्ष डॉ. रवींद्र आरळी, नगरसेवक, भारतीय जनता पार्टीचे पदाधिकारी, कार्यकर्ते आणि नागरिक मोठ्या संख्येने उपस्थित होते.
“विकसित जत – सक्षम जत” या संकल्पनेला उपस्थित जनसमुदायाने उत्स्फूर्त प्रतिसाद दिला. आगामी काळात महायुती सरकारच्या माध्यमातून जत तालुक्याचा सर्वांगीण विकास होऊन तालुक्याचा कायापालट घडेल, असा विश्वास यावेळी व्यक्त करण्यात आला.
