पालघर :
मोखाडा तालुक्यातील बोटोशी परिसरातील मरकटवाडी येथील विवाहितेच्या आत्महत्येप्रकरणी संबंधित सासरच्या मंडळींवर गुन्हा दाखल करण्याच्या मागणीसाठी एल्गार कष्टकरी संघटनेच्या वतीने मोखाडा पोलीस ठाण्यासमोर धरणे आंदोलन करण्यात आले.
मिळालेल्या माहितीनुसार, शोभा शंकर कामडी (वय २०) या विवाहितेने १ मे रोजी शेतावरील घरात गळफास घेऊन आत्महत्या केली. या घटनेची मोखाडा पोलीस ठाण्यात अकस्मात मृत्यू अशी नोंद करण्यात आली आहे.
मात्र, शोभा कामडी हिला सासरच्या लोकांकडून मानसिक त्रास दिला जात असल्याने तिने आत्महत्या केल्याचा आरोप तिच्या माहेरच्यांनी केला आहे. याप्रकरणी संबंधितांवर आत्महत्येस प्रवृत्त केल्याचा गुन्हा दाखल करण्यात यावा, अशी मागणी करत तक्रार अर्ज पोलीस ठाण्यात देण्यात आला आहे.
या मागणीसाठी एल्गार कष्टकरी संघटनेचे अध्यक्ष भगवान मधे यांच्या नेतृत्वाखाली कार्यकर्त्यांनी मोखाडा पोलीस ठाण्यासमोर रणरणत्या उन्हात धरणे आंदोलन केले.
दरम्यान, या प्रकरणी अकस्मात मृत्यूची नोंद करण्यात आली असून तपास पूर्ण झाल्यानंतर पुढील कायदेशीर कारवाई करण्यात येईल, अशी माहिती मोखाडा पोलिसांनी माध्यमांना दिली आहे.
