कमी पाण्यात शेती करणे काळाची गरज : सहकार मंत्री बाबासाहेब पाटील

चाकूर प्रतिनिधी

बोथी (ता. चाकूर) येथे गाळमुक्त धरण – गाळमुक्त शिवार अभियानांतर्गत नदी खोलीकरण व रुंदीकरण कामाचा शुभारंभ तसेच जलतारा प्रकल्पाच्या पाहणी दौऱ्याप्रसंगी महाराष्ट्र राज्याचे सहकार मंत्री नामदार बाबासाहेब पाटील यांनी शेतकऱ्यांना कमी पाण्यात शेती करण्याचे आवाहन केले.

यावेळी व्यासपीठावर लातूर जिल्हाधिकारी डॉ. भारत बास्टेवाड, सिद्धी शुगर अलाईड इंडस्ट्रीजचे व्यवस्थापकीय संचालक अविनाश जाधव, जिल्हा परिषद उपाध्यक्ष दयानंद सुरवसे, राष्ट्रवादी तालुकाध्यक्ष शिवाजीराव काळे, संजय गांधी निराधार समितीचे अध्यक्ष सिद्धेश्वर अंकलकोटे, उपसभापती भुजंग शिंदे, जिल्हा परिषद सदस्य भानुदास पोटे, नगरसेवक भागवत फुले, शिवदर्शन स्वामी, राम कसबे, भालचंद्र चाटे, धनंजय चाटे, मधुकर मुंडे, नरेंद्र हाके, विष्णू तीकटे, अनिल वाडकर, संदीप शेटे, सचिन तोरे, कार्यकारी अभियंता जावेद पटेल, गटविकास अधिकारी संतोष वंगवाडे, नायब तहसीलदार दिगंबर स्वामी यांच्यासह विविध मान्यवर उपस्थित होते.

सहकार मंत्री बाबासाहेब पाटील म्हणाले की, “जलतारा प्रकल्प हा शेतकऱ्यांसाठी अत्यंत महत्त्वाचा असून बोथी गावातील शेतकऱ्यांनी या उपक्रमाला मोठ्या प्रमाणात प्रतिसाद द्यावा. आपल्या गावातील पाणी गावातच जिरविले पाहिजे. त्यामुळे भूजल पातळी वाढण्यास मदत होईल आणि पाण्याचे स्त्रोत अधिक उपलब्ध होतील.”

पुढे बोलताना त्यांनी शेतकऱ्यांनी चांगल्या उत्पादनासाठी माती परीक्षण करणे आवश्यक असल्याचे सांगितले. तसेच भविष्यातील पाणीटंचाई लक्षात घेता कमी पाण्यात शेती करण्यावर भर देण्याचे आवाहन केले.

कार्यक्रमाचे प्रास्ताविक आयोजक बळी पाटील यांनी केले. सिद्धी शुगर अलाईड इंडस्ट्रीजचे व्यवस्थापकीय संचालक अविनाश जाधव यांनीही जलतारा प्रकल्पाविषयी मार्गदर्शन केले. सूत्रसंचालन मधुकर कांबळे यांनी केले.

चौकट : जलतारा प्रकल्प काय?

जलतारा प्रकल्पांतर्गत प्रत्येक शेतकऱ्याने आपल्या एका एकर शेतात ५ फूट बाय ५ फूट आकाराचा एक खड्डा खोदायचा आहे. या खड्ड्यांमुळे पावसाचे लाखो लिटर पाणी थेट जमिनीत मुरते आणि भूजल पातळी वाढण्यास मदत होते. त्यानंतर हेच पाणी विहिरींच्या माध्यमातून शेतकऱ्यांना उपलब्ध होते.

यंदा ‘एल निनो’चे संकट येण्याची शक्यता असल्याने पाणीटंचाई निर्माण होऊ शकते. त्यामुळे प्रत्येक गावात किमान एक हजार जलतारा खड्डे तयार करण्यासाठी प्रयत्न करावेत, असे आवाहन जिल्हाधिकारी डॉ. भारत बास्टेवाड यांनी यावेळी केले.