मारेगाव : मारेगाव तालुक्यातील मार्डी सर्कल अंतर्गत येणाऱ्या बोधाड येथे ६५ वर्षीय महिलेवर मारहाण झाल्याची घटना उघडकीस आली असून, याप्रकरणी मारेगाव पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, आरोपी दिलीप उद्धव मडावी (वय ४९, रा. बोधाड) याने चंद्रकलाबाई दामोदर चांदेकर (वय ६५, रा. बोधाड) यांना शिवीगाळ करून थपडा व बुक्क्यांनी मारहाण केली. या मारहाणीत त्यांच्या हाताच्या मनगटाला दुखापत झाली असून, वैद्यकीय तपासणीत दुखापतीचे निदान झाल्याची माहिती मिळाली आहे.
फिर्यादी चंद्रकलाबाई चांदेकर यांनी स्वतः मारेगाव पोलीस ठाण्यात उपस्थित राहून आरोपीविरुद्ध तक्रार दाखल केली. महिलेच्या म्हणण्यानुसार, त्या पाण्याच्या बोअरवेल दुरुस्तीसाठी आपल्या भावाच्या घरी गेल्या होत्या. त्यावेळी तेथे बोअर मेकॅनिक आणि त्यांचा भाऊ उपस्थित होता. बोअर सुरू करण्यासाठी एक बादली पाण्याची आवश्यकता होती. याच किरकोळ कारणावरून आरोपीने वाद घालत शिवीगाळ केली आणि लाथाबुक्क्यांनी मारहाण केल्याचा आरोप तक्रारीत करण्यात आला आहे.
या प्रकरणाचा पुढील तपास मारेगाव पोलीस करीत आहेत.
