मोहगाव : मोहगाव येथील वनक्षेत्रातील पाझर तलावातील गाळ काढण्याच्या कामास सुरुवात करण्यात आली असून, या उपक्रमामुळे परिसरातील भूजल पातळी वाढण्यास मोठी मदत होणार आहे. वन विभागाच्या सहकार्याने सेवा सहयोग फाउंडेशन व ब्लू इंजिनिअरिंग यांच्या सीएसआर निधीतून तसेच वनवासी विकास प्रतिष्ठानच्या सातत्यपूर्ण प्रयत्नांतून सामूहिक वनक्षेत्र योजनेअंतर्गत हे काम हाती घेण्यात आले आहे.
सुमारे १९८० पूर्वी बांधण्यात आलेला हा पाझर तलाव गेल्या अनेक वर्षांपासून गाळाने पूर्णपणे भरला होता. त्यामुळे तलावाची पाणी साठवण क्षमता मोठ्या प्रमाणात घटली होती. आता गाळ काढण्याचे काम सुरू झाल्याने तलावाची क्षमता वाढणार असून परिसरातील पाण्याची उपलब्धता सुधारण्यास मदत होणार आहे.
या तलावाचा लाभ गावालगत असलेल्या सुमारे २५६ हेक्टर वनक्षेत्रातील वन्यजीवांनाही होणार असल्याचे ग्रामस्थांनी सांगितले. या उपक्रमामुळे पर्यावरण संवर्धनासह जलसंधारणालाही चालना मिळणार आहे.
यावेळी सरपंच लक्ष्मण महाले, उपसरपंच सुरेश चौरे, मन्साराम गावित, निलेश ठाकरे, उमेश देशमुख, वासुदेव जगताप, राजेश महाले, किरण गावित, सोमनाथ गांगुर्डे, रमेश गावित, मल्लेश गायकवाड, सोन्या चौरे, दिनेश महाले, बाबूलाल पवार, बाबुलाल गांगुर्डे यांच्यासह ग्रामस्थ मोठ्या संख्येने उपस्थित होते.
