काल्याचे कीर्तन, दीपोत्सव व महाप्रसादाने होणार सांगता
अंबाजोगाई | प्रतिनिधी
अंबाजोगाई येथील श्री संत गजानन महाराज भक्त मंडळाच्या वतीने श्री गजानन विजय ग्रंथाच्या चार दिवसीय सामुदायिक पारायण सोहळ्याचे आयोजन दि. २६ मे ते २९ मे २०२६ दरम्यान सकाळी ७ ते १० या वेळेत देशपांडे गल्लीतील धाकटे देवघर येथे करण्यात आले आहे.
सोहळ्याची सांगता शुक्रवार, दि. २९ मे रोजी सकाळी १० वाजता हभप शिवाजी महाराज मुळे (आडस) यांच्या काल्याच्या कीर्तनाने होणार असून, त्यानंतर पालखी उत्सव, महाआरती, महाप्रसाद, ‘सत्संग श्री गजाननाचा’ तसेच दीपोत्सवात ‘श्रीं’ची शेजारती होणार आहे.
शहरातील श्री संत गजानन महाराज भक्त मंडळाच्या वतीने हभप वै. दत्तात्रय जोशी महाराज नळेगावकर यांच्या कृपाआशीर्वादाने गेली १३ वर्षे हा सोहळा भक्तिभावाने साजरा केला जात आहे. यंदा या पारायण सोहळ्याचे १४ वे वर्ष असून प्रमुख उपस्थिती हभप आनंद महाराज जोशी नळेगाव यांची राहणार आहे.
कार्यक्रमाचे स्वरूप
दि. २६ मे रोजी पहाटे ४ वाजता मंगलध्वनीने सोहळ्याची सुरुवात होईल. पहाटे ५ वाजता रुद्राभिषेक व आरती होणार असून सकाळी ७ ते १० या वेळेत श्री गजानन विजय ग्रंथाचे पारायण पार पडेल. सायंकाळी श्री विठ्ठल-रुक्मिणी महिला भजनी मंडळाचे सांप्रदायिक भजन तसेच हभप श्रीपाद बुवा अभ्यंकर (पिंपरी-चिंचवड) यांचे कीर्तन होणार आहे.
दि. २७ मे रोजी पारायणासोबत सरोजनी देशपांडे, वैशाली विडेकर व मधुरा बाभुळगावकर यांचे भक्ती संगीत आयोजित करण्यात आले असून, हभप प्रभंजन महाराज भगत (लोणी) यांचे कीर्तन होणार आहे.
दि. २८ मे रोजी अध्याय १५ ते २१ चे पारायण, ग्रंथपूजन, ग्रंथदिंडी व श्री गजानन महाराजांचा भव्य पालखी उत्सव पार पडणार आहे. सायंकाळी ५ वाजता अंबानगरीतून पालखी मिरवणूक विविध मार्गाने काढण्यात येणार आहे.
पुरस्कार वितरण सोहळा
दि. २९ मे रोजी काल्याच्या कीर्तनानंतर मंडळाच्या वतीने ‘कै. दत्तात्रय महाराज जोशी स्मृती आध्यात्मिक सेवा पुरस्कार’ हभप रामचंद्र महाराज चिंचोलकर, संभाजीनगर यांना प्रदान करण्यात येणार आहे.
शेवटी महाआरती, महाप्रसाद, ‘सत्संग श्री गजाननाचा’ व दीपोत्सवात शेजारतीने कार्यक्रमाची सांगता होणार आहे.
या पारायण सोहळ्यासह विविध धार्मिक कार्यक्रम आणि महाप्रसादाचा लाभ अंबाजोगाई शहर व पंचक्रोशीतील भाविकांनी मोठ्या संख्येने घ्यावा, असे आवाहन श्री संत गजानन महाराज भक्त मंडळाच्या वतीने करण्यात आले आहे.
