अंबाजोगाई | प्रतिनिधी
पंतप्रधान Narendra Modi यांनी पर्यावरण संवर्धन, इंधन बचत आणि निरोगी जीवनशैलीचा संदेश देत देशवासियांना सायकल वापर वाढविण्याचे आवाहन केले आहे. त्यांच्या या प्रेरणादायी संदेशाला प्रतिसाद देत अंबाजोगाई येथील दिनदयाळ बँकेचे मुख्य कार्यकारी अधिकारी (सीईओ) महेश उत्तमराव शेळके यांनी आपल्या दैनंदिन कामासाठी सायकलचा वापर करत बँकेत उपस्थिती लावली.
महेश शेळके यांनी सायकलचा वापर करून पर्यावरणपूरक जीवनशैलीचा आदर्श समाजासमोर ठेवला आहे. वाढते प्रदूषण, इंधन दरवाढ आणि बदलते हवामान लक्षात घेता प्रत्येक नागरिकाने शक्य तितक्या प्रमाणात सायकलचा वापर करणे आवश्यक असल्याचे त्यांनी सांगितले. “सायकल ही केवळ प्रवासाचे साधन नसून आरोग्य आणि पर्यावरण जपण्याचा प्रभावी मार्ग आहे,” असे मत त्यांनी व्यक्त केले.
त्यांच्या या उपक्रमाचे बँकेतील अधिकारी, कर्मचारी तसेच नागरिकांकडून स्वागत करण्यात आले. अनेकांनी या उपक्रमाचे कौतुक करत समाजातील इतरांनीही पर्यावरण संवर्धनासाठी अशा प्रकारे पुढाकार घ्यावा, अशी अपेक्षा व्यक्त केली.
पंतप्रधान नरेंद्र मोदी यांच्या ‘फिट इंडिया’ अभियान आणि पर्यावरण संवर्धनाच्या संदेशाला प्रतिसाद देत समाजातील विविध स्तरांतील व्यक्ती पुढे येत आहेत. महेश शेळके यांच्या या कृतीमुळे अंबाजोगाई शहरात सकारात्मक संदेश गेला असून युवकांनीही सायकलचा अधिकाधिक वापर करावा, अशी भावना नागरिकांतून व्यक्त होत आहे.
पर्यावरण रक्षण, आरोग्य संवर्धन आणि इंधन बचतीसाठी सायकल संस्कृती रुजविणे ही काळाची गरज असून समाजाने यासाठी पुढाकार घ्यावा, असे आवाहन यावेळी करण्यात आले.
