भीमाशंकर : प्रतिनिधी
श्रीक्षेत्र भीमाशंकर येथे मागील चार महिन्यांपासून सुरू असलेली विकास आराखड्याची कामे अत्यंत संथ गतीने सुरू असल्याचा आरोप स्थानिक ग्रामस्थांनी केला आहे. सार्वजनिक बांधकाम विभाग आणि पुरातत्त्व विभाग यांच्यातील समन्वयाच्या अभावामुळे कामांचा वेग मंदावल्याचे चित्र दिसत आहे.
जिल्हाधिकाऱ्यांनी २२ मे रोजी मंदिर भाविकांसाठी खुले होणार असल्याची घोषणा केली असली, तरी प्रत्यक्षात त्या दिवशी मंदिर खुले होणार नसल्याची चर्चा असून याबाबत शासनाकडून स्पष्ट माहिती मिळत नसल्याचेही स्थानिकांचे म्हणणे आहे.
भाविकांना कायमस्वरूपी व सुलभ दर्शनासाठी नवीन व्यवस्था उभारण्याचे काम सुरू असल्याचे सांगितले जात असले तरी, मंदिरासमोरील प्रवेश मंडपासाठी उभारण्यात आलेली लोखंडी शेड अद्याप अपूर्ण आहे. त्यामुळे दर्शन व्यवस्था पूर्णपणे कार्यान्वित होण्याबाबत अनिश्चितता कायम आहे.
याशिवाय मंदिर परिसरात पावसाळ्यापूर्वी पाण्याचा निचरा होण्यासाठी योग्य व्यवस्था नसल्याने भाविकांना अडचणींचा सामना करावा लागू शकतो, अशीही स्थानिकांची चिंता आहे. ठेकेदाराकडूनही कामाकडे दुर्लक्ष होत असल्याचा आरोप करण्यात आला आहे.
भीमाशंकर हे अत्यंत महत्त्वाचे धार्मिक व पर्यटनस्थळ असल्याने येथील विकासकामे तातडीने पूर्ण करून भाविकांसाठी आवश्यक सुविधा उपलब्ध करून द्याव्यात, अशी मागणी स्थानिक नागरिकांनी केली आहे.
