शिरपूर : प्रतिनिधी
धुळे जिल्ह्यातील शिरपूर तालुक्यातील दुर्बळ्या गावातील रेशन दुकान क्रमांक १४९८१६१०००१३ येथे रेशन वाटप प्रक्रियेत अनियमितता व भ्रष्टाचार होत असल्याचा गंभीर आरोप गावातील लाभार्थ्यांनी केला आहे. या संदर्भात २१ मे २०२६ रोजी तहसीलदार शिरपूर, उपविभागीय अधिकारी शिरपूर तसेच जिल्हाधिकारी धुळे यांच्याकडे लेखी तक्रार दाखल करण्यात आली आहे.
तक्रारीनुसार, संबंधित रेशन दुकान चालक श्रीमती लताबाई वसंत पावरा या शासनाकडून मिळणारे धान्य नियमानुसार वाटप करत नसल्याचा आरोप करण्यात आला आहे. यापूर्वीही तक्रारी करूनही कोणतीही ठोस कारवाई न झाल्याने ग्रामस्थांमध्ये नाराजी व्यक्त होत आहे.
लाभार्थ्यांनी सांगितले की, PHH (Priority Households) आणि AAY (Antyodaya Anna Yojana) योजनेअंतर्गत ठरलेल्या प्रमाणात धान्य मिळणे अपेक्षित असताना प्रत्यक्षात कमी धान्य दिले जात आहे. “आम्हाला पुढूनच कमी धान्य आले आहे” किंवा “एडजस्ट करून घ्या” अशी उत्तरे दिली जात असल्याचा आरोपही करण्यात आला आहे.
तसेच रेशन वाटपाची पावती दिली जात नसल्याचे आणि प्रश्न विचारल्यानंतर वाटप थांबवले जात असल्याचेही तक्रारीत नमूद करण्यात आले आहे. अनेक लाभार्थी अशिक्षित असल्याचा गैरफायदा घेतला जात असल्याचा आरोपही करण्यात आला आहे.
शासनाच्या प्रणालीवर अंगठा घेऊन पूर्ण धान्य वितरित झाल्याचे दाखवले जात असले तरी प्रत्यक्षात कमी धान्य मिळत असल्याचा दावा करण्यात आला आहे. संबंधित रेशन दुकानाला पूर्वी काळ्या यादीत टाकण्याची मागणी करण्यात आली होती, ती पुन्हा एकदा करण्यात आली आहे.
या प्रकरणी तातडीने चौकशी करून कायदेशीर कारवाई करावी, तसेच रेशन वाटपात पारदर्शकता आणावी, अशी मागणी ग्रामस्थांनी केली आहे.
निवेदन सादर करताना अखिल भारतीय आदिवासी विकास परिषदेचे पदाधिकारी, युवा प्रदेश महासचिव महाराष्ट्र राज्य ॲड. दारासिंग पावरा, उपसरपंच साहेबराव पावरा आणि भावसिंग पावरा उपस्थित होते.
