मारेगाव प्रतिनिधी :
देवळा येथे दोन सख्या भावांमध्ये झालेल्या वादातून जीवघेणा हल्ला झाल्याची धक्कादायक घटना समोर आली आहे. या घटनेत अनिल बावणे हे गंभीर जखमी झाले असून त्यांच्यावर पुढील उपचारासाठी चंद्रपूर येथे हलविण्यात आले आहे.
मिळालेल्या माहितीनुसार, वडील रामदास संभाजी बावणे हे केगाव येथे वास्तव्यास असून त्यांच्या दोन मुलांनी उदरनिर्वाहासाठी देवळा गावात वास्तव्य केले होते. दोन्ही भाऊ एकत्र राहत असताना त्यांच्यात काही कारणावरून वाद झाला. या वादाचे रूपांतर हाणामारीत होऊन आरोपी सुनील बावणे याने आपल्या सख्या भावावर फावड्याने जीवघेणा हल्ला केल्याचे सांगितले जात आहे.
घटनेची माहिती मिळताच वडील रामदास बावणे यांनी तातडीने देवळा गाव गाठले. त्यावेळी अनिल बावणे हे घराच्या हॉलमध्ये रक्तबंबाळ अवस्थेत पडलेले आढळले. ग्रामस्थांच्या मदतीने त्यांना तातडीने ग्रामीण रुग्णालय मारेगाव येथे उपचारासाठी दाखल करण्यात आले. मात्र प्रकृती गंभीर असल्याने डॉक्टरांनी त्यांना पुढील उपचारासाठी चंद्रपूर येथे रेफर केले.
या घटनेमागील नेमके कारण अद्याप स्पष्ट झाले नसून पोलिसांकडून तपास सुरू आहे. मारेगाव पोलीस निरीक्षक शाम वानखेडे यांच्या मार्गदर्शनाखाली जीपीएसआय दिगंबर किनाके पुढील तपास करीत आहेत.
