धोंदलगाव, ता. वैजापूर| प्रतिनिधी
खरीप हंगाम तोंडावर आला असताना धोंदलगाव परिसरातील शेतकरी डिझेल टंचाईमुळे मोठ्या संकटात सापडले आहेत. शेती मशागतीच्या कामांना वेग आला असतानाच येथील पेट्रोल पंपावर डिझेल भरण्यासाठी शेतकऱ्यांची मोठी गर्दी उसळली असून ट्रॅक्टर, टेम्पो, जीप आणि इतर वाहनांच्या लांबलचक रांगा लागल्याचे चित्र पाहायला मिळत आहे.
विशेष म्हणजे अनेक शेतकरी डिझेल साठवण्यासाठी रंगीबेरंगी कॅन घेऊन पेट्रोल पंपावर सकाळपासूनच थांबलेले दिसत आहेत. भर उन्हात आपला नंबर कधी येणार याची वाट पाहत शेतकरी तासनतास उभे राहत असल्याने संताप व्यक्त केला जात आहे.
सध्या नांगरणी, रोटाव्हेटर, पेरणीपूर्व मशागत आणि पाणीपुरवठ्यासाठी ट्रॅक्टर व डिझेल पंपांचा मोठ्या प्रमाणात वापर होत आहे. मात्र अचानक निर्माण झालेल्या डिझेल तुटवड्यामुळे शेतकऱ्यांचे संपूर्ण नियोजन कोलमडले आहे. “वेळेत डिझेल मिळाले नाही तर पेरणीची कामे रखडतील आणि खरीप हंगाम धोक्यात येईल,” अशी चिंता शेतकरी व्यक्त करत आहेत.
काही ठिकाणी डिझेल कॅनमध्ये देण्यास नकार दिला जात असल्याने ग्रामीण भागातील शेतकऱ्यांना मोठा मनस्ताप सहन करावा लागत आहे. शेतातील स्थिर पंप किंवा मशागतीची यंत्रे पेट्रोल पंपावर नेणे शक्य नसल्याने अनेकांची अडचण वाढली आहे.
दरम्यान, इंधन टंचाईबाबत विविध अफवा पसरत असल्याने नागरिकांमध्ये संभ्रमाचे वातावरण निर्माण झाले आहे. प्रशासनाकडून पुरेसा इंधनसाठा उपलब्ध असल्याचे सांगितले जात असले तरी प्रत्यक्षात पंपांवर मोठ्या रांगा दिसत आहेत.
शेतकऱ्यांनी प्रशासनाकडे तातडीने डिझेल पुरवठा सुरळीत करण्याची मागणी केली असून खरीप हंगाम लक्षात घेता ग्रामीण भागासाठी स्वतंत्र नियोजन करण्याची आवश्यकता व्यक्त केली जात आहे.
