कन्नड | प्रतिनिधी
कन्नड तालुक्यातील रोहिला येथील रहिवासी तथा सेवानिवृत्त अभियंते श्री. अशोकराव गंगाधरराव गायकवाड यांची राष्ट्रवादी काँग्रेस पक्षाच्या छत्रपती संभाजीनगर उपजिल्हाध्यक्षपदी नियुक्ती करण्यात आली आहे. त्यांच्या या निवडीमुळे पक्ष कार्यकर्त्यांमध्ये उत्साहाचे वातावरण निर्माण झाले असून विविध स्तरांतून त्यांच्यावर शुभेच्छांचा वर्षाव होत आहे.
शासकीय सेवेत अभियंता म्हणून दीर्घकाळ कार्यरत राहिलेल्या अशोकराव गायकवाड यांनी आपल्या कार्यकाळात प्रशासकीय अनुभव आणि लोकाभिमुख कार्यशैलीची छाप उमटवली. निवृत्तीनंतर त्यांनी सामाजिक कार्यात सक्रिय सहभाग घेत परिसरातील विविध प्रश्नांवर काम केले. त्यांच्या याच अनुभवाची दखल घेत पक्षश्रेष्ठींनी त्यांच्यावर उपजिल्हाध्यक्षपदाची महत्त्वपूर्ण जबाबदारी सोपवली आहे.
या नियुक्तीनंतर राष्ट्रवादी काँग्रेसचे कार्यकर्ते संतोष कोल्हे यांनी पुष्पगुच्छ देऊन अशोकराव गायकवाड यांचे अभिनंदन केले. यावेळी बोलताना त्यांनी सांगितले की, “अशोकराव गायकवाड यांच्यासारख्या अभ्यासू, अनुभवी आणि जनसंपर्क मजबूत असलेल्या व्यक्तीची निवड झाल्यामुळे पक्ष संघटनेला नवचैतन्य मिळेल. त्यांच्या मार्गदर्शनाखाली जिल्ह्यात पक्ष अधिक बळकट होईल, असा विश्वास आहे.”
दरम्यान, या निवडीबद्दल कन्नड तालुका आणि रोहिला परिसरातील राष्ट्रवादी काँग्रेस पदाधिकारी, कार्यकर्ते आणि नागरिकांनी आनंद व्यक्त केला आहे. पक्षाने दाखवलेला विश्वास सार्थ ठरवत जनतेच्या प्रश्नांसाठी सातत्याने कार्यरत राहणार असल्याचे अशोकराव गायकवाड यांनी सांगितले.
