अभ्यागत समितीच्या प्रयत्नांना यश
दोंडाईचा | प्रतिनिधी
दोंडाईचा उपजिल्हा रुग्णालयातील विविध समस्यांबाबत नुकतीच अभ्यागत समितीची बैठक पार पडली होती. या बैठकीत रुग्णालयातील तज्ज्ञ डॉक्टरांच्या रिक्त जागांचा प्रश्न प्राधान्याने मांडण्यात आला होता. विशेषतः गरोदर महिला व महिला रुग्णांच्या उपचारासाठी स्त्रीरोग तज्ज्ञांची अत्यंत आवश्यकता असल्याची मागणी समितीकडून करण्यात आली होती.
या पार्श्वभूमीवर मा. ना. Jaykumar Rawal यांच्या निर्देशानुसार प्रभारी जिल्हा शल्य चिकित्सक डॉ. रविंद्र सोनवणे यांनी दोंडाईचा उपजिल्हा रुग्णालयाला भेट देऊन समस्या जाणून घेतल्या होत्या. तसेच वरिष्ठ स्तरावर पाठपुरावा करून समस्या सोडविण्याचे आश्वासन दिले होते.
त्याच अनुषंगाने जिल्हा शल्य चिकित्सक डॉ. रविंद्र सोनवणे यांनी तातडीने दखल घेत दोंडाईचा शहरातील प्रसिद्ध स्त्रीरोग तज्ज्ञ डॉ. जयश्री पाटील यांची अस्थायी स्वरूपात नियुक्ती केली असून त्यांना तत्काळ रुजू होण्याचे आदेश देण्यात आले आहेत.
या नियुक्तीमुळे परिसरातील गरोदर महिला तसेच विविध स्त्रीरोगांच्या उपचारासाठी येणाऱ्या रुग्णांना मोठा दिलासा मिळणार आहे. अनेक दिवसांपासून स्त्रीरोग तज्ज्ञांच्या अभावामुळे महिलांना बाहेरगावी जावे लागत होते. आता ही समस्या मोठ्या प्रमाणात कमी होणार असल्याची भावना नागरिकांनी व्यक्त केली आहे.
या नियुक्तीसाठी मा. ना. जयकुमार भाऊ रावल, जिल्हा शल्य चिकित्सक डॉ. रविंद्र सोनवणे, वैद्यकीय अधीक्षक डॉ. भरत कुलकर्णी यांचे अभ्यागत समिती सदस्य प्रवीण महाजन, जितेंद्र गिरासे, राकेश अग्रवाल, ईश्वर धनगर, रवि अहिरे, सौ. पूजा खडसे तसेच भाजप शहराध्यक्ष जितेंद्र गिरासे, बांधकाम सभापती मुकेश देवरे, शिक्षण सभापती वैशाली कागणे, नगरसेवक हितेंद्र महाले, कृष्णा नगराळे, विजय मराठे, मनोज निकम आदी पदाधिकाऱ्यांनी आभार मानले आहेत.
