कन्नड | प्रतिनिधी
कन्नड तालुका व परिसरात अवैध मटका व सट्टा व्यवसाय पुन्हा एकदा जोर धरू लागल्याचे चित्र दिसत असून यामुळे कायदा व सुव्यवस्थेवर प्रश्नचिन्ह निर्माण झाले आहे.
पाणपोई परिसरात ‘श्रीदेवी’ नावाचा मटका सर्रास सुरू असल्याचा आरोप नागरिकांकडून केला जात आहे. येथे दिवसभर सट्टा खेळणाऱ्यांची गर्दी दिसून येत असून ‘टाईम बाजार’, ‘मिलन डे’ आणि ‘कल्याण’ यांसारख्या सट्टा बाजारांमध्ये खुलेआम व्यवहार सुरू असल्याची चर्चा आहे.
स्थानिक नागरिकांच्या म्हणण्यानुसार, उपविभागीय अधिकारी अपराजिता अग्निहोत्री यांनी पदभार स्वीकारल्यानंतर सुरुवातीला अवैध धंद्यांवर मोठा वचक निर्माण झाला होता आणि अनेक ठिकाणी हे धंदे बंदही करण्यात आले होते. मात्र अलीकडील काळात हे अवैध व्यवसाय पुन्हा सक्रिय झाल्याचे चित्र दिसत आहे.
“माल लगाव माल मिलेगा” अशा प्रकारच्या घोषणांखाली हे सट्टा व्यवहार सुरू असल्याचा आरोप नागरिकांकडून केला जात आहे. त्यामुळे पोलिसांचा व प्रशासनाचा धाक कमी झाल्याची भावना परिसरात व्यक्त होत आहे.
दरम्यान, नागरिकांकडून या अवैध धंद्यांवर तातडीने कठोर कारवाई करून पुन्हा नियंत्रण आणावे, अशी मागणी जोर धरत आहे. प्रशासन या गंभीर प्रकाराकडे कसे लक्ष देते याकडे आता संपूर्ण तालुक्याचे लक्ष लागले आहे.
