माहूर | प्रतिनिधी
माहूर तालुक्यातील श्री गणेश शिक्षण प्रसारक मंडळ, रुपला नाईक तांडा (ता. माहूर, जि. नांदेड) येथील अध्यक्ष यादव रुपलाजी जाधव यांना पाच वर्षांसाठी विश्वस्तपदावरून दूर करण्याचा आदेश सहाय्यक धर्मदाय आयुक्त नांदेड यांनी दिला आहे.
नोंदणी क्रमांक F-2022, नांदेड असलेल्या या संस्थेविरोधात अर्ज चौकशी क्र. 08/2010 (जुना) व 08/2024 (नवीन) अंतर्गत चौकशी करण्यात आली होती. या चौकशीदरम्यान प्रतिवादी यादव रुपलाजी जाधव हे म.प्र. न्यास अधिनियमातील कलम 41(1)(क) व 34(1)(क) अंतर्गत दोषी आढळले.
या निष्कर्षानुसार सहाय्यक धर्मदाय आयुक्त एच. के. शेळके यांनी 15 एप्रिल 2026 रोजी आदेश पारित करत यादव जाधव यांची पाच वर्षांसाठी पदच्युती (गच्छंती) करण्याचा निर्णय दिला आहे.
तथापि, हा आदेश सध्या माननीय उच्च न्यायालयात प्रलंबित असलेल्या रिट याचिका क्र. 11199/2023 च्या अंतिम निर्णयाच्या अधीन लागू राहणार आहे, असे आदेशात स्पष्ट करण्यात आले आहे.
या प्रकरणातील काही अपीलार्थींचे निधन झाल्यामुळे त्यांच्यावरील आरोपांतून मुक्तता करण्यात आली आहे. तसेच इतर काही अपीलार्थींनाही आरोपांतून मुक्त करण्यात आले असल्याचे आदेशात नमूद आहे.
सदर सुनावणी 4 सप्टेंबर 2025 रोजी पूर्ण झाली होती. या निर्णयामुळे शिक्षण संस्थेच्या प्रशासनात मोठा बदल अपेक्षित असून पुढील कारवाईकडे सर्वांचे लक्ष लागले आहे.
