सेलू (वर्धा) | प्रतिनिधी
बोर व्याघ्र प्रकल्पातील ढगा-राहाटी परिसरात सध्या वाघिणीच्या हालचालींमुळे जंगल सफारी अधिकच आकर्षक बनली आहे. या परिसरात ‘कॅटरिना’ नावाने ओळखली जाणारी वाघीण आपल्या तीन बछड्यांसह वावरत असून ती त्यांना प्रत्यक्ष शिकारीचे प्रशिक्षण देताना दिसत आहे.
वन अधिकाऱ्यांच्या माहितीनुसार, सुमारे सात महिन्यांचे हे तीन बछडे आईसोबत जंगलातील शिकारीचे कौशल्य आत्मसात करत आहेत. नीलगायीच्या शिकारीदरम्यान वाघीण बछड्यांना वेढा घालणे, दबा धरून बसणे आणि पाठलाग करण्याचे तंत्र शिकवत असल्याचे वन कर्मचाऱ्यांनी निरीक्षण केले.
या शिकारीच्या प्रसंगात वाघीण आणि बछड्यांनी अत्यंत समन्वयाने हालचाली केल्याचे दिसून आले. मात्र वन विभागाच्या वाहनाचा आवाज झाल्याने नीलगायीला पळून जाण्याची संधी मिळाली आणि ती बचावली.
तरीही वाघीण व तिच्या बछड्यांनी दाखवलेले शिकारीचे कौशल्य आणि नैसर्गिक समन्वय वन कर्मचाऱ्यांसाठीही आश्चर्याचा विषय ठरला आहे.
ढगा-राहाटी परिसरात वाघांचा वाढता वावर आणि बछड्यांचे प्रशिक्षण हे वन्यजीव संवर्धनाच्या दृष्टीने सकारात्मक संकेत मानले जात आहेत. या घटनेमुळे पर्यटकांना जंगलातील नैसर्गिक जीवनचक्र आणि अन्नसाखळी प्रत्यक्ष अनुभवण्याची दुर्मिळ संधी मिळत आहे.
