नागपूर | प्रतिनिधी
शिक्षण क्षेत्रातील विविध ज्वलंत प्रश्नांवर भाजप शिक्षक आघाडी पूर्व विदर्भाचे अध्यक्ष अनिल महादेवराव शिवणकर यांनी मुख्यमंत्री देवेंद्र फडणवीस यांची नागपूर येथील रामगिरी बंगल्यावर भेट घेऊन सविस्तर चर्चा केली.
या भेटीदरम्यान त्यांनी शालेय शिक्षण विभागाच्या 11 मे 2026 च्या शासन पत्रानुसार ग्रामीण व दुर्गम भागातील इयत्ता 9 वी व 10 वी साठी लागू असलेली 20 पटसंख्या व 3 शिक्षकांची अनुज्ञेयता ही सवलत शहरातील शाळांनाही लागू करावी, अशी मागणी केली. यामुळे शहरातील मराठी माध्यमाच्या अनुदानित शाळांना संरक्षण मिळेल, असे त्यांनी निवेदनात नमूद केले.
तसेच विदर्भातील उष्णतेचा विचार करता शाळा 15 जूनऐवजी 26 जूनपासून सुरू कराव्यात, समावेशित शिक्षण योजनेंतर्गत 963 विशेष शिक्षकांचे रिक्त पदांवर समायोजन करावे, तसेच समग्र शिक्षा अभियानातील 3200 कर्मचाऱ्यांचे समायोजन त्याच विभागात करावे, अशा विविध मागण्या यावेळी मांडण्यात आल्या.
जनगणना कार्यासाठी केलेल्या सेवेमुळे अर्जित रजा रोखीकरणाचा शासन निर्णय, दीर्घकाळ मानधनावर कार्यरत कला, क्रीडा व इतर शिक्षकांचे समायोजन, तसेच पदवीधर शिक्षकांना सरसकट पदवीधर वेतनश्रेणी लागू करण्याबाबतही चर्चा झाली. विद्यार्थ्यांना गणवेश व पाठ्यपुस्तके वेळेत मिळावीत, यावरही भर देण्यात आला.
या सर्व मागण्यांवर मुख्यमंत्री देवेंद्र फडणवीस यांनी सकारात्मक प्रतिसाद देत त्या प्रश्नांवर योग्य तो निर्णय घेतला जाईल, असे आश्वासन दिल्याचे शिवणकर यांनी सांगितले.
दरम्यान, 9 वी व 10 वी वर्गासाठी 20 पटसंख्या लागू करण्याबाबतच्या अंमलबजावणीतील अडचणी, शिक्षक समायोजन व वेतन प्रक्रियेतील विलंब यावरही निवेदनात चिंता व्यक्त करण्यात आली आहे. शाळांमध्ये टीसी देणे, प्रवेश प्रक्रिया, शिक्षकांचे समायोजन आणि शालार्थ प्रणालीतील अडचणींमुळे निर्माण झालेल्या समस्यांकडे तातडीने लक्ष देण्याची मागणी करण्यात आली आहे.
