अंबाजोगाई: शनिवारी सायंकाळी ६:४५ च्या सुमारास केज तालुक्यात प्रचंड उकाड्यानंतर अचानक आलेल्या भयानक वादळी वारा, विजांचा कडकडाट आणि अवकाळी पावसाने संपूर्ण तालुक्याला झोडपून काढले. या नैसर्गिक आपत्तीत युसुफवडगाव आणि आडस कृषी मंडळातील युसुफवडगाव, सोनिजवळा, धनेगाव, भालगाव, बावची, साळेगाव, माळेगाव, सुर्डी, सोनेसांगवी, सुकळी, गोटेगाव, मोटेगाव, बोबडेवाडी, आनेगाव, नायगाव, आवसगाव यांसह अनेक गावांना मोठा फटका बसला आहे. या वादळामुळे शेतकऱ्यांच्या केळी आणि पपईच्या बागा उन्मळून पडल्या असून, काढणीला आलेल्या आंब्याचा खच पडला आहे. अनेक घरांचे पत्रे उडून गेले असून विजेचे खांब आणि रोहित्र कोसळल्याने संपूर्ण यंत्रणा कोलमडली आहे. बळीराजाच्या तोंडाशी आलेला घास या निसर्गाच्या कोपामुळे हिरावला गेल्याने तालुक्यात अत्यंत चिंताजनक आणि गंभीर परिस्थिती निर्माण झाली आहे.
या भीषण परिस्थितीची माहिती मिळताच केज मतदारसंघाच्या आमदार नमिता मुंदडा यांनी तात्काळ प्रशासकीय यंत्रणेला गतिमान करत स्वतः बचाव आणि मदतकार्याची सूत्रे हाती घेतली. आमदार नमिता मुंदडा यांनी केजचे तहसीलदार, गटविकास अधिकारी आणि तालुका कृषी अधिकारी यांना तातडीने बाधित गावांचा दौरा करून परिस्थितीची प्रत्यक्ष पाहणी करण्याचे कडक निर्देश दिले होते. आमदार मुंदडा यांच्या सूचनेनुसार सर्व संबंधित अधिकाऱ्यांनी रविवारी सकाळपासूनच बाधित परिसरात दाखल होत युद्धपातळीवर पंचनामे सुरू केले असून, दिवसभरात जवळपास ९० टक्के पंचनामे पूर्ण झाले आहेत. शेती पिके, फळबागा, घरे आणि वीज यंत्रणेच्या झालेल्या नुकसानीचे अचूक पंचनामे करून बाधित नागरिकांना व शेतकऱ्यांना शासनाकडून त्वरित आणि जास्तीत जास्त आर्थिक मदत मिळवून देण्यासाठी आपण कटिबद्ध असल्याचे आमदार मुंदडा यांनी स्पष्ट केले आहे. तसेच प्रशासनाने या कामात कोणताही हलगर्जीपणा करू नये, अशा कडक सूचना त्यांनी दिल्या आहेत.
नुकसानग्रस्तांना तातडीने दिलासा देण्यासाठी आमदार नमिता मुंदडा यांनी जिल्हाधिकारी विवेक जॉन्सन यांच्याशी सविस्तर चर्चा करून शासनाकडे मदतीचा प्रस्ताव पाठविण्याबाबत पावले उचलली आहेत. या गंभीर संकटातून शेतकऱ्यांना सावरण्यासाठी आमदार नमिता मुंदडा सोमवारी मुख्यमंत्री देवेंद्र फडणवीस यांची मुंबईत प्रत्यक्ष भेट घेणार आहेत. या भेटीत त्या तालुक्यातील नैसर्गिक आपत्तीची संपूर्ण माहिती देऊन केजमधील वादळग्रस्त नागरिकांना आणि शेतकऱ्यांना विशेष पॅकेज व तातडीची आर्थिक मदत मंजूर करण्याची आग्रही विनंती करणार आहेत.
