ब्रम्हपुरी | प्रतिनिधी
ब्रम्हपुरी तालुक्यातील कोसंबी खडसमारा येथे गॅस सिलिंडर स्फोटामुळे तीन भावांची घरे जळून खाक झाल्याची दुर्दैवी घटना नुकतीच घडली. या आगीत मोठ्या प्रमाणावर मालमत्तेचे नुकसान झाले असून परिसरात हळहळ व्यक्त होत आहे.
घटनेची माहिती मिळताच ब्रम्हपुरी विधानसभा मतदारसंघाचे आमदार विजय वडेट्टीवार यांनी तातडीने दखल घेत पीडित कुटुंबीयांना आर्थिक मदत केली. तसेच आपल्या कार्यकर्त्यांना संबंधित कुटुंबीयांशी संपर्क साधून मदतकार्य करण्याच्या सूचना दिल्या.
या दुर्घटनेत संतोष निकुरे, कार्तिक निकुरे आणि रूषी निकुरे यांच्या घरातील संसारोपयोगी साहित्य, धान्य, कपडे तसेच इतर महत्त्वाच्या वस्तू जळून खाक झाल्या. अचानक आलेल्या या संकटामुळे कुटुंबीयांवर मोठा आर्थिक भार पडला आहे.
यावेळी आमदार विजय वडेट्टीवार यांनी पीडित कुटुंबीयांना धीर देत शासन स्तरावरूनही मदत मिळवून देण्यासाठी प्रयत्न करण्यात येणार असल्याचे सांगितले. संकटाच्या काळात आपण कुटुंबीयांच्या पाठीशी ठामपणे उभे आहोत, असा विश्वास त्यांनी व्यक्त केला.
आर्थिक मदत देताना तालुका काँग्रेस कमिटीचे अध्यक्ष खेमराज तिडके, सरचिटणीस गुरुदेव वाघरे, युवक काँग्रेसचे जिल्हा सरचिटणीस रुपेश बानबले, उपसरपंच सुरेश ठिकरे, ज्ञानेश्वर झरकर यांच्यासह काँग्रेस कार्यकर्ते आणि ग्रामस्थ मोठ्या संख्येने उपस्थित होते.
