ब्रम्हपुरी || दि. २५ मे
गडचिरोली-चिमूर लोकसभा क्षेत्राचे खासदार Dr. Namdev Kirsan यांनी गेवर्धा येथील आदिवासी आश्रम शाळेच्या बांधकामस्थळी भेट देऊन सुरू असलेल्या कामाची पाहणी केली. केंद्रीय आदिवासी मंत्र्यांच्या सूचनेनुसार ही पाहणी करण्यात आली.
केंद्र शासनाच्या माध्यमातून मंजूर करण्यात आलेल्या एकलव्य इंग्रजी माध्यम निवासी शाळेच्या बांधकामाची खासदार किरसान यांनी प्रत्यक्ष पाहणी करून संबंधित अधिकाऱ्यांना दर्जेदार व गुणवत्तापूर्ण काम करण्याच्या सूचना दिल्या. आदिवासी विद्यार्थ्यांना आधुनिक सुविधा आणि गुणवत्तापूर्ण शिक्षण उपलब्ध व्हावे, यासाठी बांधकाम उच्च दर्जाचे असणे आवश्यक असल्याचे त्यांनी यावेळी सांगितले.
दुर्गम व आदिवासी भागातील विद्यार्थ्यांना शिक्षणाच्या मुख्य प्रवाहात आणण्यासाठी केंद्र शासन विविध योजना राबवत असून, एकलव्य निवासी शाळा हा त्यातील महत्त्वाचा प्रकल्प असल्याचेही खासदार किरसान यांनी नमूद केले.
या प्रकल्पामुळे परिसरातील आदिवासी मुला-मुलींना आधुनिक शिक्षणासह निवासी सुविधा उपलब्ध होणार असून त्यांच्या शैक्षणिक प्रगतीला चालना मिळणार आहे.
यावेळी आदिवासी काँग्रेसचे जिल्हाध्यक्ष माधव गावड, सी.पी.डब्ल्यू.डी. विभागाचे अभियंते तसेच बांधकाम कंपनीचे प्रतिनिधी उपस्थित होते.
