पनवेल| प्रतिनिधी:
पेट्रोल आणि डिझेलच्या सातत्याने वाढणाऱ्या दरांच्या निषेधार्थ आज पनवेलमध्ये महाराष्ट्र नवनिर्माण सेना आणि मनसे वाहतूक सेनेच्या वतीने एक अत्यंत अनोखे आणि उपरोधिक आंदोलन करण्यात आले. वाहतूक सेनेचे जिल्हा संघटक सचिन जाधव यांनी थेट ‘चित्रगुप्त’ रूप धारण करत या आगळ्यावेगळ्या आंदोलनाचे नेतृत्व केले. पनवेलमधील एका पेट्रोल पंपावर सोमवारी हे आंदोलन पार पडले.
या अनोख्या आंदोलनादरम्यान चक्क ‘चित्रगुप्त’ प्रकट झाले होते, जे या आंदोलनाचे प्रमुख आकर्षण ठरले. चित्रगुप्तांच्या वेशातील व्यक्तीने, केंद्र सरकार करत असलेल्या दरवाढीमुळे सर्वसामान्य जनतेची होणारी लूट आणि हाल यांची नोंद आपल्या चोपड्यामध्ये (हिशोबाच्या वहीत) केल्याचे दाखवले
‘मेलोडी खा, खुश राहा’ म्हणत सरकारवर निशाणा साधण्यात आला या आंदोलना दरम्यान पेट्रोल पंपावर येणाऱ्या वाहनधारकांना आणि नागरिकांना “मेलोडी” चॉकलेटचे वाटप करण्यात आले. वाढत्या महागाईमुळे आणि इंधन दरवाढीमुळे सर्वसामान्य जनतेच्या डोक्यावर मोठा ताण निर्माण झाला आहे. या परिस्थितीवर उपरोधिक भाष्य करताना आंदोलनकर्त्यांनी नागरिकांना सांगितले की, “सरकार महागाई कमी करत नसेल, तर निदान मेलोडी खा… सर्व व्यथा थोड्या वेळासाठी का होईना दूर होतील! खुश राहा… कारण पेट्रोल-डिझेलचे दर मात्र थांबायचे नाव घेत नाहीत!” या उपरोधिक संदेशाद्वारे मनसैनिकांनी सर्वसामान्य जनतेच्या मनातील तीव्र संताप आणि भावना शासनापर्यंत पोहोचवण्याचा प्रयत्न केला.
इंधन दरवाढीमुळे वाहतुकीचा खर्च वाढला असून जीवनावश्यक वस्तूंच्या किमतींमध्येही मोठी वाढ होत आहे. यामुळे घर चालवणे अत्यंत कठीण झाले असून, महागाईचा भडका उडाल्यामुळे आंदोलनात सहभागी झालेल्या महिलांनी आपला तीव्र संताप व्यक्त केला.या अनोख्या आंदोलनाच्या माध्यमातून मनसेने महागाईच्या मुद्यावर केंद्र सरकारला कोंडीत पकडण्याचा प्रयत्न केला आहे.
मनसे पदाधिकाऱ्यांची मोठी उपस्थितीया अनोख्या आंदोलनात मनसेचे जिल्हाध्यक्ष संदेश भाई ठाकूर, वाहतूक सेना जिल्हा संघटक सचिन जाधव (चित्रगुप्त), जिल्हा सचिव स्नेहल बागल, पनवेल महानगर सचिव पराग बालड, पनवेल उप तालुका अध्यक्ष दीपेश जी पोपेटा आणि वाहतूक सेना जिल्हा संघटक दशरथ मुंडे यांनी सक्रिय सहभाग घेतला.
तसेच पनवेल महानगर महिला अध्यक्ष स्वरूपा सुर्वे, पनवेल उपशहर अध्यक्ष रोहन पाटील, विधानसभा संघटिका पूजा मोहन, वाहतूक सेना उपाध्यक्ष पूनम जयस्वाल, आशिता पाटील, क्रांती सारंग,मनिषा देशमुख, सिद्धेश पावले, गिरीश तिवारी यांच्यासह मनसे व वाहतूक सेनेचे इतर आक्रमक पदाधिकारी आणि कार्यकर्ते मोठ्या संख्येने उपस्थित होते.
सध्या पनवेल शहरात मनसेच्या या ‘चित्रगुप्त’ आंदोलनाची आणि त्यांनी दिलेल्या इशाऱ्याची जोरदार चर्चा रंगली आहे
