वाऱ्हा | प्रतिनिधी
वाऱ्हा ग्रामपंचायत येथे आज हयातीचे प्रमाणपत्र (DLC) तसेच बस कार्ड कॅम्पचे आयोजन उत्साहात करण्यात आले. या कॅम्पमध्ये संजय गांधी निराधार योजना, श्रावणबाळ योजना आणि विविध शासकीय योजनांतील लाभार्थ्यांना हयातीचे प्रमाणपत्र काढून देण्यात आले. यासोबतच नागरिकांना बस कार्ड संदर्भातील विविध सेवा उपलब्ध करून देण्यात आल्या.
सदर उपक्रम वाऱ्हा ग्रामपंचायतीचे सरपंच प्रशांत अडपावार यांच्या नेतृत्वाखाली यशस्वीरीत्या पार पडला. कॅम्पमध्ये मोठ्या संख्येने शेतकरी व नागरिकांनी उपस्थित राहून शासकीय सेवांचा लाभ घेतला.
यावेळी कृषी सहाय्यक बोके मॅडम यांनी उपस्थित शेतकऱ्यांना ‘महाविस्तार AI’ ॲपचे नोंदणी व डाउनलोड करून त्याबाबत सविस्तर माहिती दिली. आधुनिक तंत्रज्ञानाच्या माध्यमातून शेतीविषयक माहिती सहज उपलब्ध होण्यासाठी हे ॲप उपयुक्त ठरणार असल्याचे त्यांनी सांगितले.
कार्यक्रमास ग्रामपंचायत सदस्य, कर्मचारी तसेच गावातील मान्यवर मोठ्या संख्येने उपस्थित होते. ग्रामपंचायतीच्या या लोकाभिमुख उपक्रमाचे नागरिकांकडून कौतुक करण्यात आले.
