परभणीत आता ‘चाय पे चर्चा’ नाही, तर ‘धोंड्यावर चर्चा’!
पाथरी | प्रतिनिधी :
आगामी विधान परिषद निवडणुकीच्या पार्श्वभूमीवर परभणी जिल्ह्यातील राजकीय वातावरण चांगलेच तापले असून, नेत्यांनी मतदार आणि कार्यकर्त्यांशी संपर्क वाढवण्यासाठी नवा राजकीय फॉर्म्युला अवलंबल्याची चर्चा रंगली आहे. सध्या जिल्ह्यात ‘धोंडे जेवण’ पॉलिटिक्सची जोरदार चर्चा सुरू असून विविध राजकीय कार्यक्रमांमधून अप्रत्यक्ष राजकीय रणनीती आखली जात असल्याचे चित्र दिसत आहे.
अधिक मासानिमित्त आयोजित करण्यात येणाऱ्या पारंपरिक ‘धोंडे जेवण’ कार्यक्रमांचा वापर आता राजकीय गाठीभेटी आणि संपर्क मोहिमांसाठी केला जात असल्याची चर्चा राजकीय वर्तुळात रंगू लागली आहे.
Dr. Rahul Patil यांच्या वतीने परभणी मेडिकल कॉलेज आणि आर.पी. हॉस्पिटल येथे आयोजित करण्यात आलेल्या भव्य धोंडे जेवण कार्यक्रमाला विविध पक्षांतील नेते आणि पदाधिकाऱ्यांची उपस्थिती विशेष चर्चेचा विषय ठरली. या कार्यक्रमाला काँग्रेसचे ग्रामीण जिल्हाध्यक्ष बाबाजानी दुर्राणी, शहर जिल्हाध्यक्ष रविराज देशमुख, युवा नेते तारेक खान दुर्राणी, उपसरपंच सलमान भाई यांच्यासह अनेक नगरसेवक उपस्थित होते.
राजकीयदृष्ट्या विरोधी भूमिका घेणारे नेते अशा धार्मिक आणि कौटुंबिक कार्यक्रमांच्या निमित्ताने एकत्र आल्याने आगामी राजकीय समीकरणांबाबत तर्कवितर्कांना उधाण आले आहे.
दरम्यान, Bandu Jadhav यांच्या वतीने यशवाडी देवस्थान येथे आयोजित करण्यात आलेल्या धोंडे जेवण कार्यक्रमालाही सर्वपक्षीय कार्यकर्ते आणि नेत्यांनी मोठ्या संख्येने हजेरी लावली. विधान परिषद निवडणुकीच्या पार्श्वभूमीवर प्रत्येक मत आणि प्रत्येक कार्यकर्ता महत्त्वाचा मानला जात असल्याचे या उपस्थितीतून दिसून आले.
‘धोंडे जेवण’मागील राजकीय गणित?
हिंदू संस्कृतीत अधिक मासाला विशेष महत्त्व असून या काळात जावयाला सन्मानाने धोंडे व विविध भेटवस्तू दिल्या जातात. मात्र, परभणीतील राजकारणात या परंपरेला निवडणूक रणनीतीचे स्वरूप प्राप्त झाल्याची चर्चा सुरू आहे.
राजकीय वर्तुळात सध्या “जावई नव्हे, तर मतदार आणि सहकारी नेतेच राजकीय अवतार झाले आहेत,” अशा मिश्किल प्रतिक्रिया उमटत आहेत.
सूत्रांच्या माहितीनुसार, अशा कार्यक्रमांच्या माध्यमातून नेत्यांमध्ये अनौपचारिक चर्चा, राजकीय खलबते आणि आगामी निवडणुकांसाठी रणनीती आखली जात आहे. जेवणाच्या निमित्ताने विविध पक्षांतील नेत्यांना जवळ करण्याचा प्रयत्नही सुरू असल्याचे बोलले जात आहे.
आगामी विधान परिषद निवडणुकीत या ‘धोंडे जेवण’ पॉलिटिक्सचा नेमका कोणाला फायदा होणार आणि कोणाचे राजकीय समीकरण बदलणार, याकडे आता जिल्ह्याचे लक्ष लागले आहे.
