आजरा :
केंद्र आणि राज्य सरकारच्या धोरणांमुळे वाढत चाललेल्या महागाईच्या निषेधार्थ शिवसेना (उद्धव बाळासाहेब ठाकरे) पक्षाच्या वतीने आजरा तालुक्यात तीव्र आंदोलन छेडण्यात येणार आहे. येत्या शुक्रवार, दिनांक २९ मे २०२६ रोजी सकाळी ११ वाजता आजरा येथील संभाजी चौक येथे ‘रास्ता रोको’ आणि बैलगाडी मोर्चाचे आयोजन करण्यात आल्याची माहिती शिवसेना तालुका प्रमुख युवराज पोवार यांनी दिली.
या आंदोलनासंदर्भातील अधिकृत निवेदन शिवसेनेच्या शिष्टमंडळाने आजरा येथील तहसीलदार तसेच पोलीस निरीक्षक यांना सादर केले आहे.
महागाईमुळे सर्वसामान्यांचे आर्थिक कंबरडे मोडले
शिवसेनेने दिलेल्या निवेदनात गेल्या काही दिवसांत पेट्रोलमध्ये ३ रुपयांची वाढ करण्यात आल्याचा उल्लेख करण्यात आला आहे. तसेच डिझेल, घरगुती गॅस आणि सीएनजी गॅसच्या दरवाढीमुळे जीवनावश्यक वस्तूंचे भाव प्रचंड वाढले असून सर्वसामान्य नागरिकांचे जगणे कठीण झाल्याचा आरोप करण्यात आला आहे.
शासनाच्या भूमिकेवर टीका
निवेदनात केंद्र आणि राज्य शासनाच्या भूमिकेवरही जोरदार टीका करण्यात आली आहे. “एकीकडे पंतप्रधान आणि मंत्री मोठमोठ्या ताफ्यासह दौरे करत आहेत, तर दुसरीकडे सामान्य नागरिकांना पेट्रोल-डिझेल कमी वापरण्याचा सल्ला दिला जात आहे,” असा आरोप आंदोलनकर्त्यांनी केला आहे.
बैलगाड्यांसह ‘रास्ता रोको’
महागाईच्या निषेधार्थ २९ मे रोजी संभाजी चौक येथे बैलगाड्यांसह ‘रास्ता रोको’ आंदोलन करण्यात येणार असून या आंदोलनात मोठ्या संख्येने नागरिक व शिवसैनिक सहभागी होणार असल्याची माहिती देण्यात आली.
या निवेदनावर शिवसेना उपजिल्हा प्रमुख संभाजी पाटील, तालुका प्रमुख युवराज पोवार, शहर प्रमुख समीर चांद, तालुका संघटक संजय येसाडे, युवासेना तालुका प्रमुख सुयश पाटील यांच्यासह अनेक पदाधिकाऱ्यांच्या स्वाक्षऱ्या आहेत.
शिवसेनेच्या वतीने सर्वसामान्य नागरिकांनी व कार्यकर्त्यांनी मोठ्या संख्येने आंदोलनात सहभागी व्हावे, असे आवाहन करण्यात आले आहे.
