यवतमाळ, प्रतिनिधी : विजय बारस्कर
खरीप हंगामाच्या तोंडावर यवतमाळ जिल्ह्यातील बळीराजासाठी एक मोठी दिलासादायक बातमी आहे. जिल्हाधिकारी विकास मीना यांनी शेतकऱ्यांची गरज ओळखून ऐतिहासिक निर्णय घेतला आहे.
काय आहे निर्णय?
- ट्रॅक्टरच्या टाकीसह कॅनलाही डिझेल: आता शेतकरी स्वतःचे वाहन म्हणजे ट्रॅक्टर घेऊन पेट्रोल पंपावर गेल्यास, ट्रॅक्टरची टाकी पूर्ण भरून शिवाय सोबत 40 लिटर क्षमतेच्या कॅनमध्येही डिझेल भरून मिळणार.
- अट फक्त एकच: शेतकऱ्याने स्वतःचे वाहन म्हणजे ट्रॅक्टर सोबत आणणे आणि वाहनाची आरसी बुक दाखवणे बंधनकारक.
- बॉटल, डब्यात विक्री बंद: सुरक्षेच्या कारणास्तव कॅन, बॉटल किंवा इतर भांड्यांत खुलेआम डिझेल विक्रीवर पूर्णपणे बंदी. फक्त 40 लिटरच्या अधिकृत कॅनलाच परवानगी.
निर्णयामागची भूमिका
खरीपाची लगबग सुरू झाली असून शेतमशागतीसाठी डिझेलची मोठी गरज असते. मात्र समाज माध्यमांवर तुटवड्याच्या अफवा पसरल्याने पंपावर गर्दी होत होती. तसेच ज्वलनशील पदार्थांची खुलेआम विक्री धोकादायक ठरू शकते. म्हणूनच जिल्हाधिकाऱ्यांनी कायदा व सुव्यवस्था अबाधित ठेवण्यासाठी हा समतोल साधणारा निर्णय घेतला.
पेट्रोल पंपांसाठी कडक सूचना
- रात्रीच्या वेळी होणारी अवैध विक्री रोखण्यासाठी सर्व पंपांवर CCTV यंत्रणा 24×7 कार्यरत ठेवावी.
- मागील 40 दिवसांचे CCTV फुटेज जतन करून मागणी केल्यास तत्काळ उपलब्ध करून द्यावे.
- प्रत्येक पंपावर उपलब्ध साठा व मागणी केलेला साठा याचा फलक दर्शनी भागात लावणे बंधनकारक.
- अफवांवर विश्वास ठेवू नये, असे आवाहन करणारे फलक लावावेत.
जिल्हाधिकारी विकास मीना यांच्या या निर्णयामुळे शेतकऱ्यांची शेतात जाऊन डिझेल संपण्याची चिंता मिटणार आहे. एकाच वेळी ट्रॅक्टरची टाकी आणि 40 लिटरचा कॅन भरल्याने मशागतीची कामे वेळेत पूर्ण होण्यास मदत होईल. अत्यावश्यक सेवा व रुग्णवाहिकांना प्राधान्याने डिझेल पुरवठा करण्याचे आदेशही देण्यात आले आहेत.
हा आदेश पुढील सूचना मिळेपर्यंत लागू राहणार असून, शेतकऱ्यांनी नियमांचे पालन करून प्रशासनाला सहकार्य करावे, असे आवाहन करण्यात आले आहे.
