वाशिम प्रतिनिधी : वाशिम जिल्ह्यातील राजगाव येथे भीषण अपघाताची दुर्दैवी घटना घडली असून भरधाव मालवाहू वाहनाने दुचाकीला जोरदार धडक दिल्याने पित्याचा जागीच मृत्यू झाला, तर त्यांच्या दोन चिमुकल्या मुलींचा उपचारादरम्यान मृत्यू झाला आहे. या दुर्घटनेत पत्नी गंभीर जखमी झाली असून तिच्यावर खासगी रुग्णालयात उपचार सुरू आहेत.
मृतांमध्ये Dnyaneshwar Khadse (वय ३०), Kirtika Khadse (वय ६) आणि Ketaki Khadse (वय ३) यांचा समावेश आहे.
मिळालेल्या माहितीनुसार, ज्ञानेश्वर खडसे हे आपल्या पत्नी आणि दोन मुलींसह दुचाकीवरून प्रवास करत असताना भरधाव मालवाहू वाहनाने त्यांच्या दुचाकीला जोरदार धडक दिली. अपघात इतका भीषण होता की ज्ञानेश्वर खडसे यांचा घटनास्थळीच मृत्यू झाला. तर गंभीर जखमी झालेल्या दोन्ही चिमुकल्या मुलींना तातडीने रुग्णालयात दाखल करण्यात आले. मात्र उपचार सुरू असताना त्यांचीही प्राणज्योत मालवली.
या दुर्घटनेत आई गंभीर जखमी झाली असून तिच्यावर खासगी रुग्णालयात उपचार सुरू आहेत. घटनेनंतर परिसरात हळहळ व्यक्त केली जात असून संपूर्ण गावावर शोककळा पसरली आहे.
घटनेची माहिती मिळताच पोलिसांनी घटनास्थळी धाव घेत पंचनामा केला. अपघातप्रकरणी पुढील तपास सुरू असून संबंधित वाहनचालकाविरुद्ध कारवाईची प्रक्रिया सुरू असल्याची माहिती पोलिसांकडून देण्यात आली.
