यवतमाळ प्रतिनिधी : घाटंजी तालुक्यातील पार्डी नस्करी येथे जंगली अस्वलाच्या हल्ल्याची धक्कादायक घटना घडली असून या हल्ल्यात आई आणि मुलगा गंभीर जखमी झाले आहेत. आज सकाळी सुमारे ८ वाजण्याच्या सुमारास ही घटना घडली.
मिळालेल्या माहितीनुसार, Tarasing Jadhav (वय ४५) आणि Jhalabai Jadhav (वय ६५) हे दोघे सकाळी शेतीच्या कामासाठी शेताकडे जात होते. त्यावेळी गावाशेजारील शेत परिसरात दबा धरून बसलेल्या जंगली अस्वलाने अचानक त्यांच्यावर हल्ला केला.
अस्वलाच्या हल्ल्यात दोघेही गंभीर जखमी झाले असून त्यांच्या शरीरावर गंभीर जखमा झाल्या आहेत. घटनेनंतर परिसरातील नागरिकांनी तत्काळ धाव घेत दोघांना उपचारासाठी बाहेर काढले. त्यानंतर त्यांना पुढील उपचारासाठी यवतमाळ येथील रुग्णालयात हलविण्यात आले आहे.
या घटनेमुळे परिसरातील नागरिकांमध्ये भीतीचे वातावरण निर्माण झाले असून वनविभागाने तातडीने उपाययोजना कराव्यात, अशी मागणी ग्रामस्थांकडून करण्यात येत आहे. शेतकरी आणि नागरिकांनी शेतात जाताना सतर्क राहावे, असे आवाहनही करण्यात आले आहे.
