मुख्यमंत्री समृद्ध पंचायतराज अभियानात ता.नेर,पाथ्रड,गोळे ग्रामपंचायतीची दैदिप्यमान कामगिरी
यवतमाळ,
प्रतिनिधी, विजय बारस्कर
नेर,तालुक्यात प्रथम क्रमांक; ₹15 लाखांचे पारितोषिक आणि जिल्हास्तरासाठी पात्रता
महाराष्ट्र शासनाच्या महत्त्वाकांक्षी मुख्यमंत्री समृद्ध पंचायतराज अभियानामध्ये नेर तालुक्यातील आदर्श ग्राम पाथ्रड गोळे ग्रामपंचायतीने उल्लेखनीय आणि अभिमानास्पद यश संपादन करत तालुकास्तरावर प्रथम क्रमांक पटकाविला आहे. या यशाबद्दल ग्रामपंचायतीस ₹15 लाख रुपयांच्या पारितोषिकाचा बहुमान प्राप्त झाला असून ग्रामपंचायत जिल्हास्तरीय स्पर्धेसाठी पात्र ठरली आहे.
मा. सौ. निलिमा रोशन चोपडे ( सरपंच तथा प्रशासक) यांच्या दूरदर्शी नेतृत्वाखाली तसेच ग्रामपंचायत अधिकारी श्री. अमोल घावडे यांच्या प्रभावी नियोजन, समन्वय आणि सातत्यपूर्ण प्रयत्नांमुळे ग्रामपंचायतीने स्वच्छता, आरोग्य, पाणीपुरवठा, पर्यावरण संवर्धन, सामाजिक विकास, लोकसहभाग आणि विविध नाविन्यपूर्ण उपक्रमांची यशस्वी अंमलबजावणी करून हा मानाचा बहुमान प्राप्त केला आहे.
या यशामागे ग्रामपंचायत सदस्य, कर्मचारी, महिला बचत गट, युवक मंडळे, शासकीय अधिकारी-कर्मचारी तसेच सर्व ग्रामस्थांचे मोलाचे योगदान लाभले आहे. ग्रामविकासासाठी एकजुटीने केलेल्या प्रयत्नांचे हे फलित असून संपूर्ण गावासाठी हा अभिमानाचा क्षण आहे.
तालुकास्तरावरील या ऐतिहासिक यशानंतर आता पाथ्रड, ग्रामपंचायत जिल्हास्तरावरही उत्कृष्ट कामगिरी करून नेर तालुक्याचा गौरव वाढवेल, असा विश्वास व्यक्त करण्यात येत आहे.
पाथ्रड गोळे ग्रामपंचायतीच्या या यशाबद्दल सर्व स्तरातून अभिनंदनाचा वर्षाव होत असून ग्रामस्थांमध्ये उत्साहाचे वातावरण निर्माण झाले आहे.
