वाशी / प्रतिनिधी
वाशी शहरात ईद-उल-अजहा (बकरी ईद) मोठ्या उत्साहात, शांततेत आणि धार्मिक वातावरणात साजरी करण्यात आली. सकाळी ठीक ९ वाजता शहरातील ईदगाह मैदानावर मुस्लिम बांधवांनी सामूहिक ईदची नमाज अदा केली. नमाजनंतर एकमेकांना मिठी मारत ईदच्या शुभेच्छा देण्यात आल्या.
यावेळी देशाच्या प्रगतीसाठी, अखंड एकतेसाठी, सामाजिक सलोख्यासाठी तसेच देशाच्या सीमेवर कर्तव्य बजावणाऱ्या सैनिकांच्या सुरक्षिततेसाठी विशेष दुवा करण्यात आली. देशात शांतता, बंधुभाव आणि सौहार्द कायम राहावे, अशी प्रार्थनाही करण्यात आली.
“एकता, सलोखा आणि देशप्रेमाचा संदेश देत शासनाच्या नियमांचे पालन करूनच परवानगी दिलेल्या पशूंची कुर्बानी केली जाणार आहे,” अशी माहिती शहाबाज काजी यांनी दिली.
तसेच वाशी शहरातील मुस्लिम समाजाने यापूर्वीही सामाजिक सलोखा जपत एकादशीच्या दिवशी बकरी ईद पुढे ढकलण्याचा निर्णय घेतला होता. त्या निर्णयाचाही यावेळी आदरपूर्वक उल्लेख करण्यात आला.
ईदच्या पार्श्वभूमीवर शहरात चोख पोलीस बंदोबस्त ठेवण्यात आला होता. शांततेत आणि सुरळीतरीत्या सण पार पडावा यासाठी परिश्रम घेणाऱ्या पोलीस प्रशासनाचे समाजाच्या वतीने आभार व्यक्त करण्यात आले.
वाशी शहरात दिवसभर आनंद, उत्साह, बंधुभाव आणि धार्मिक सौहार्दाचे वातावरण पाहायला मिळाले. सर्व समाजातील नागरिकांनी एकमेकांना शुभेच्छा देत सामाजिक एकतेचा संदेश दिला.
