शहादा | प्रतिनिधी
नंदुरबार जिल्ह्याची शान ठरलेल्या सात वर्षीय कु. प्रनिका प्रफुल्ल पाटील हिचा मुंबई येथील विधानभवनात महाराष्ट्राचे मुख्यमंत्री देवेंद्र फडणवीस यांच्या हस्ते विशेष सत्कार करण्यात आला. तिच्या उल्लेखनीय कामगिरीमुळे नंदुरबार जिल्ह्याच्या शिरपेचात मानाचा तुरा रोवला गेला आहे.
प्रनिकाने डिसेंबर महिन्यात पुणे येथे आयोजित आंतरराष्ट्रीय अबॅकस स्पर्धेत उल्लेखनीय यश संपादन केले होते. अवघ्या ३ मिनिटे ३९ सेकंदांत १२० गणिती प्रश्न अचूक सोडवत तिने सर्वांचे लक्ष वेधून घेतले. या उल्लेखनीय कामगिरीची दखल घेत इंडिया बुक ऑफ रेकॉर्ड्स तसेच नॅशनल बुक ऑफ रेकॉर्ड्समध्ये तिच्या विक्रमाची नोंद करण्यात आली आहे.
या यशाबद्दल विधानभवनात झालेल्या गौरव सोहळ्यात मुख्यमंत्री देवेंद्र फडणवीस यांच्या हस्ते तिचा सत्कार करण्यात आला. यावेळी शहादा मतदारसंघाचे आमदार राजेश पाडवी, महसूल मंत्री चंद्रशेखर बावनकुळे, मंत्री गिरीश महाजन तसेच अनेक आमदार, मंत्री आणि मान्यवर उपस्थित होते. उपस्थितांनी प्रनिकाच्या बुद्धिमत्ता, मेहनत आणि कर्तृत्वाचे कौतुक करत तिच्या उज्ज्वल भविष्यासाठी शुभेच्छा दिल्या.
कु. प्रनिका ही औरंगपूर येथील प्रगतिशील शेतकरी सुरेश गिरधर पाटील यांची नात असून, शहादा येथील शल्यचिकित्सक ॲड. डॉ. प्रफुल्ल सुरेश पाटील यांची कन्या आहे. तिच्या यशामागे आई निकिता पाटील यांचे प्रोत्साहन आणि अबॅकस प्रशिक्षिका स्मिता सोनार यांचे मार्गदर्शन लाभले.
प्रनिकाच्या या अभूतपूर्व यशामुळे शहाद्यासह संपूर्ण नंदुरबार जिल्ह्यात आनंदाचे वातावरण असून विविध स्तरांतून तिच्यावर अभिनंदनाचा वर्षाव होत आहे.
