गंगाखेड | प्रतिनिधी राजेश वट्टमवार
गंगाखेड तालुक्यातील गुंजेगाव व राणी सावरगाव या मंडळांमध्ये सप्टेंबर व ऑक्टोबर २०२५ दरम्यान झालेल्या अतिवृष्टीमुळे खरीप पिकांचे मोठ्या प्रमाणावर नुकसान झाले होते. या नैसर्गिक आपत्तीमुळे शेतकऱ्यांचे आर्थिक नुकसान झाल्याने प्रधानमंत्री पीक विमा योजनेअंतर्गत मदतीची अपेक्षा निर्माण झाली होती. मात्र, विमा भरूनही अद्याप नुकसानग्रस्त शेतकऱ्यांना विम्याचा लाभ मिळालेला नसल्याने शेतकऱ्यांमध्ये तीव्र नाराजी व्यक्त होत आहे.
खरीप हंगाम २०२५-२६ मध्ये गुंजेगाव व राणी सावरगाव मंडळातील शेतकऱ्यांनी प्रधानमंत्री पीक विमा योजनेअंतर्गत नियमितपणे विमा हप्ता भरला होता. अतिवृष्टीमुळे पिकांचे मोठे नुकसान झाल्यानंतर शासनाच्या योजनेतून आर्थिक मदत मिळेल, अशी अपेक्षा शेतकऱ्यांना होती. मात्र अनेक महिने उलटूनही विमा मंजूर न झाल्याने शेतकरी आर्थिक अडचणीत सापडले आहेत.
याबाबत शेतकऱ्यांच्या वतीने तहसीलदारांना निवेदन देण्यात आले असून गुंजेगाव सज्जा व राणी सावरगाव मंडळातील पात्र शेतकऱ्यांना खरीप २०२५-२६ चा पीक विमा तात्काळ मंजूर करून वितरित करावा, अशी मागणी करण्यात आली आहे.
निवेदनात असे नमूद करण्यात आले आहे की, अतिवृष्टीमुळे शेतकऱ्यांच्या हातचे पीक गेले असून अनेकांना कर्जाचा भार सहन करावा लागत आहे. अशा परिस्थितीत पीक विम्याची रक्कम मिळणे अत्यंत आवश्यक आहे. प्रशासनाने तातडीने याकडे लक्ष देऊन शेतकऱ्यांना न्याय द्यावा, अशी मागणी करण्यात आली आहे.
तसेच, निवेदन दिल्यानंतरही सात दिवसांच्या आत सकारात्मक निर्णय न झाल्यास सर्व शेतकऱ्यांना सोबत घेऊन तहसील कार्यालयासमोर आमरण उपोषण करण्यात येईल, असा इशाराही शेतकरी प्रतिनिधींनी दिला आहे. यावेळी उद्भवणाऱ्या कोणत्याही परिस्थितीची संपूर्ण जबाबदारी प्रशासनाची राहील, असेही निवेदनात स्पष्ट करण्यात आले आहे.
हे निवेदन श्रीमती शांताबाई देवराव माने, बालासाहेब कोंडीबा मोठे, विजय प्रल्हाद मुंडे, समाधान चिलगर, भास्कर ठावरे, तुकाराम हाके यांच्यासह इतर शेतकरी प्रतिनिधींनी प्रशासनाकडे सादर केले.
दरम्यान, अतिवृष्टीग्रस्त शेतकऱ्यांना पीक विम्याचा लाभ तातडीने मिळावा आणि त्यांच्या आर्थिक अडचणी दूर व्हाव्यात, अशी मागणी परिसरातील शेतकरी वर्गातून जोर धरत आहे. प्रशासन यावर काय निर्णय घेते, याकडे आता गुंजेगाव व राणी सावरगाव मंडळातील शेतकऱ्यांचे लक्ष लागले आहे.
– राजेश वट्टमवार, प्रतिनिधी, गंगाखेड
