मारेगाव, प्रतिनिधी : मारेगाव तालुक्यातील चिंचोली बोटोनी सर्कल अंतर्गत खेकडवाई फाट्याजवळ वणी–यवतमाळ महामार्गावर सोमवारी आलेल्या वादळामुळे मोठे झाड कोसळून विजेच्या तारा तुटल्याची घटना घडली. सुदैवाने कोणतीही जीवितहानी झाली नसून मोठा अनर्थ टळला.
मिळालेल्या माहितीनुसार, महामार्गावर वाहतूक सुरू असतानाच वादळी वाऱ्यामुळे झाड अचानक रस्त्यावर कोसळले. झाड कोसळताना विजेच्या तारा तुटल्या. त्या वेळी विद्युत प्रवाह सुरू असल्याने काही काळ धोकादायक परिस्थिती निर्माण झाली होती.
घटनेची माहिती मिळताच महावितरणच्या कर्मचाऱ्यांनी तातडीने घटनास्थळी धाव घेतली. त्यांनी प्रथम विद्युत प्रवाह बंद करून सुरक्षिततेची उपाययोजना केली. त्यानंतर आरीच्या साहाय्याने पडलेले झाड हटवून महामार्गावरील वाहतूक सुरळीत करण्यात आली. तसेच तुटलेल्या व गुंतलेल्या तारांची दुरुस्ती करून वीजपुरवठा पूर्ववत करण्यात आला.
महावितरण कर्मचाऱ्यांनी दाखविलेल्या तत्परतेमुळे संभाव्य दुर्घटना टळली. त्यांच्या या कार्याबद्दल परिसरातील नागरिकांनी कौतुक व्यक्त केले आहे. वर्दळीच्या मार्गावर ही घटना घडूनही कोणतीही जीवितहानी झाली नसल्याने नागरिकांनी समाधान व्यक्त केले.
