शासकीय वसतिगृह प्रवेशासाठी वेळापत्रक जाहीर; ३० जूनपासून ऑनलाइन अर्ज प्रक्रिया सुरू

पुणे | प्रतिनिधी

सामाजिक न्याय व विशेष सहाय विभागांतर्गत शैक्षणिक वर्ष २०२६-२७ साठी शासकीय वसतिगृह प्रवेश प्रक्रिया ऑनलाइन पद्धतीने राबविण्यात येणार असून, इच्छुक विद्यार्थ्यांनी विहित मुदतीत अर्ज सादर करावेत, असे आवाहन सहायक आयुक्त समाज कल्याण विशाल लोंढे यांनी केले आहे.

विभागाने जाहीर केलेल्या वेळापत्रकानुसार इयत्ता ११ वी, १२ वी तसेच बिगर व्यावसायिक अभ्यासक्रमांसाठी प्रवेश अर्ज ३० जून २०२६ पासून स्वीकारण्यात येणार आहेत. विद्यार्थ्यांना अर्ज करण्यासाठी HMAS पोर्टल या संकेतस्थळाचा वापर करावा लागणार आहे.

प्रवेश प्रक्रियेचे वेळापत्रक

• शालेय विद्यार्थ्यांसाठी अर्ज स्वीकारण्याची मुदत: ३० जून २०२६
  • प्रवेश यादी प्रसिद्धी: ७ जुलै २०२६
• इयत्ता ११ वी, १२ वी व बिगर व्यावसायिक अभ्यासक्रमांसाठी अर्ज स्वीकारण्याची मुदत: १५ जुलै २०२६
  • प्रवेश यादी प्रसिद्धी: ३१ जुलै २०२६

जिल्ह्यात २६ शासकीय वसतिगृहे

पुणे जिल्ह्यात सामाजिक न्याय विभागांतर्गत मागासवर्गीय विद्यार्थ्यांसाठी एकूण २६ शासकीय वसतिगृहे कार्यरत आहेत. त्यापैकी १५ मुलांची तर ११ मुलींची वसतिगृहे आहेत.

पुणे व पिंपरी-चिंचवड शहरांमध्ये एकूण १४ शासकीय वसतिगृहे असून त्यामध्ये ९ मुलांची आणि ५ मुलींची वसतिगृहे आहेत. याशिवाय तालुकास्तरावर १२ शासकीय वसतिगृहे कार्यरत आहेत.

सामाजिक व आर्थिकदृष्ट्या मागास घटकांतील पात्र विद्यार्थ्यांनी या योजनेचा लाभ घेऊन शिक्षणासाठी उपलब्ध असलेल्या निवास सुविधांचा उपयोग करावा, असे आवाहन समाज कल्याण विभागाने केले आहे.