भोर | प्रतिनिधी
भोर शहरातील वाढत्या अवैध धंद्यांविरोधात राष्ट्रवादी काँग्रेस पक्षाने आक्रमक भूमिका घेत संबंधितांवर कठोर कारवाईची मागणी केली आहे. शहरातील अवैध व्यवसाय तात्काळ बंद करण्यात यावेत तसेच त्यामागील संबंधित व्यक्तींवर कायद्यानुसार कठोर कारवाई करण्यात यावी, अशी मागणी पक्षाच्या वतीने करण्यात आली.
यासंदर्भात राष्ट्रवादी काँग्रेसच्या शिष्टमंडळाने भोर पोलीस स्टेशन येथे भेट देऊन पोलीस निरीक्षक अण्णा पवार यांना निवेदन सादर केले. निवेदनाद्वारे शहरातील अवैध धंद्यांमुळे सामाजिक व कायदा-सुव्यवस्थेचे प्रश्न निर्माण होत असल्याचा मुद्दा उपस्थित करण्यात आला.
यावेळी भोर नगरपालिकेचे नगराध्यक्ष रामचंद्र (नाना) आवारे, नगरसेवक तसेच राष्ट्रवादी काँग्रेसचे पदाधिकारी आणि कार्यकर्ते मोठ्या संख्येने उपस्थित होते.
शहरातील नागरिकांच्या हितासाठी आणि कायदा-सुव्यवस्था अबाधित राखण्यासाठी पोलिस प्रशासनाने तातडीने कारवाई करावी, अशी अपेक्षा यावेळी व्यक्त करण्यात आली. तसेच अवैध धंद्यांविरोधात सातत्याने पाठपुरावा करण्यात येईल, असा इशाराही पक्षाच्या पदाधिकाऱ्यांनी दिला.
