खासदार डॉ. प्रशांत पडोळे यांनी केली पाहणी; खरेदी प्रक्रियेला गती देण्याची मागणी
भंडारा | प्रतिनिधी
साकोली तालुक्यातील कुंभली येथील शासकीय मका खरेदी केंद्रावरील संथ कारभारामुळे शेतकऱ्यांना मोठ्या अडचणींचा सामना करावा लागत आहे. गेल्या नऊ दिवसांपासून अनेक शेतकरी आपल्या वाहनांसह खरेदी केंद्राबाहेर प्रतीक्षा करत असून तब्बल दोन किलोमीटरपर्यंत वाहनांच्या रांगा लागल्याचे चित्र दिसून येत आहे.
या परिस्थितीची दखल घेत भंडारा-गोंदिया लोकसभा मतदारसंघाचे खासदार डॉ. प्रशांत पडोळे यांनी प्रत्यक्ष भेट देऊन पाहणी केली. यावेळी त्यांनी शेतकऱ्यांशी संवाद साधून त्यांच्या अडचणी जाणून घेतल्या तसेच संबंधित अधिकाऱ्यांशी संपर्क साधून तातडीने उपाययोजना करण्याची मागणी केली.
शेतकऱ्यांच्या म्हणण्यानुसार, खरेदी प्रक्रियेला अत्यंत कमी गती असल्यामुळे अनेकांना दिवसन्-दिवस प्रतीक्षा करावी लागत आहे. काही शेतकऱ्यांनी जवळच्या परिसरातील मालाला प्राधान्य दिले जात असल्याची तक्रारही यावेळी व्यक्त केली. उन्हाच्या तीव्र झळांमध्ये प्रतीक्षा करणाऱ्या शेतकऱ्यांसाठी पिण्याचे पाणी, सावली किंवा इतर मूलभूत सुविधांची पुरेशी व्यवस्था नसल्याचेही निदर्शनास आले.
दरम्यान, अवकाळी पावसाचा अंदाज वर्तविण्यात आल्याने उघड्यावर ठेवलेला मका खराब होण्याची भीती शेतकऱ्यांना सतावत आहे. लाखो रुपयांच्या पिकाचे नुकसान होण्याची शक्यता असल्याने शेतकरी चिंतेत आहेत.
यावेळी खासदार डॉ. पडोळे यांनी प्रशासनाला बंद असलेली शासकीय गोदामे तातडीने सुरू करण्याची, उपलब्ध गोदामांची संख्या वाढविण्याची तसेच मका मोजमाप आणि खरेदी प्रक्रियेला गती देण्याची मागणी केली. यासंदर्भात त्यांनी जिल्हाधिकारी भंडारा आणि जिल्हा विपणन अधिकाऱ्यांशीही संपर्क साधून शेतकऱ्यांच्या समस्या मांडल्या.
प्रशासनाने तातडीने योग्य उपाययोजना करून शेतकऱ्यांना दिलासा द्यावा, अशी अपेक्षा व्यक्त करण्यात येत असून या प्रश्नाकडे संपूर्ण जिल्ह्याचे लक्ष लागले आहे.
