जत | प्रतिनिधी
जत नगरपरिषद गतिमान, पारदर्शक आणि भ्रष्टाचारमुक्त करण्याचा आमचा संकल्प असून भ्रष्टाचाराला कोणत्याही परिस्थितीत नगरपरिषदेत थारा दिला जाणार नाही, असे प्रतिपादन जत नगराध्यक्ष डॉ. रवींद्र आरळी यांनी पत्रकार परिषदेत केले. यावेळी उपनगराध्यक्ष विक्रम ताड उपस्थित होते.
डॉ. आरळी म्हणाले की, जत नगरपरिषदेत कर निर्धारण व प्रशासकीय अधिकारी म्हणून कार्यरत असलेले प्रवीण बाबर यांच्याशी संबंधित लाचलुचपत प्रकरणाचा आम्ही तीव्र निषेध करतो. या घटनेचे कोणत्याही स्तरावर समर्थन केले जाणार नाही. ही घटना नगरपरिषदेच्या प्रतिमेला धक्का देणारी असून संपूर्ण प्रकरणाची सखोल चौकशी व्हावी, अशी मागणी त्यांनी केली.
या प्रकरणाच्या तपासादरम्यान वरिष्ठ अधिकाऱ्यांचा सहभाग आहे का, याचाही शोध घेण्यात यावा, असे मत त्यांनी व्यक्त केले. नगरपरिषदेच्या निवडणूक काळातील एका बिलाच्या मंजुरीसाठी ७५ हजार रुपयांची लाच मागण्यात आल्याचा आरोप असून ५० हजार रुपयांची लाच स्वीकारताना संबंधित अधिकाऱ्याला रंगेहात पकडण्यात आल्याचे त्यांनी सांगितले.
या प्रकरणात कोणत्याही लोकप्रतिनिधींचा संबंध नसल्याचा दावा करत काही मंडळी या घटनेचे राजकारण करण्याचा प्रयत्न करत असल्याचेही त्यांनी नमूद केले.
नागरिकांना थेट संपर्काचे आवाहन
गोपीचंद पडळकर यांच्या नेतृत्वाखाली जत नगरपरिषदेत विविध विकासकामे सुरू असून ती गतीने पूर्ण करण्यासाठी प्रयत्न सुरू आहेत, असे डॉ. आरळी यांनी सांगितले.
नगरपरिषदेतील कोणत्याही कामासाठी नागरिकांनी कोणालाही पैसे देऊ नयेत. कोणत्याही अधिकारी किंवा व्यक्तीकडून पैशांची मागणी झाल्यास संबंधित प्रभागातील नगरसेवक किंवा थेट नगराध्यक्षांशी संपर्क साधावा, असे आवाहनही त्यांनी यावेळी केले.
जत नगरपरिषदेत पारदर्शक कारभार आणि विकासकामांना प्राधान्य देण्यात येत असून भ्रष्टाचाराविरोधात कठोर भूमिका कायम राहील, असा विश्वास त्यांनी व्यक्त केला.
