देवळा | प्रतिनिधी | दि. १५ जून २०२६
शालेय जीवनात जिद्द, शिस्त आणि कठोर परिश्रम यांची सांगड घातल्यास यश निश्चितपणे प्राप्त होते, असे प्रतिपादन देवळा एज्युकेशन सोसायटीच्या सचिव प्रा. डॉ. मालतीताई आहेर यांनी केले.
देवळा येथील जिजामाता कन्या विद्यालयात शासनाच्या ‘शाळा प्रवेशोत्सव’ उपक्रमांतर्गत नवागत विद्यार्थिनींचे उत्साहपूर्ण स्वागत तसेच मार्च २०२६ मध्ये झालेल्या माध्यमिक शालांत प्रमाणपत्र (एसएससी) परीक्षेत विद्यालयात प्रथम पाच क्रमांक प्राप्त करणाऱ्या गुणवंत विद्यार्थिनी व त्यांच्या पालकांचा गुणगौरव सोहळा मोठ्या उत्साहात संपन्न झाला.
कार्यक्रमाच्या अध्यक्षस्थानी विद्यालयाच्या मुख्याध्यापिका सौ. सुनिता पगार होत्या. प्रमुख पाहुणे म्हणून देवळा एज्युकेशन सोसायटीचे चेअरमन प्राचार्य डॉ. हितेंद्र आहेर, नगरपरिषद गटनेते जितेंद्र आहेर, संस्थेचे प्रशासन अधिकारी प्रा. बी. के. रौंदळ, शाळा व्यवस्थापन समितीचे अध्यक्ष जनार्दन सूर्यवंशी, विद्यालयाचे पर्यवेक्षक कौतिक खोंडे तसेच गुणवंत विद्यार्थिनींचे पालक, शिक्षक-शिक्षिका व शिक्षकेतर कर्मचारी उपस्थित होते.
कार्यक्रमाच्या प्रारंभी गुणवंत विद्यार्थिनींचा पुस्तक, गुलाबपुष्प आणि पर्यावरण संवर्धनाचा संदेश देणारे वृक्षरोप भेट देऊन सत्कार करण्यात आला. यावेळी उपस्थित मान्यवरांनी विद्यार्थिनींना शैक्षणिक वाटचालीसाठी शुभेच्छा देत उच्च ध्येय निश्चित करून सातत्यपूर्ण प्रयत्न करण्याचे आवाहन केले.
याच कार्यक्रमात एन.डी.एस.टी. अँड एन.टी. सोसायटीच्या कार्यवाहपदी निवड झाल्याबद्दल एस. टी. पाटील यांचा संस्थेच्या वतीने प्राचार्य डॉ. हितेंद्र आहेर यांच्या हस्ते विशेष सत्कार करण्यात आला.
विद्यार्थिनींना मोफत पाठ्यपुस्तक योजना अंतर्गत पाठ्यपुस्तकांचे वितरण करण्यात आले. तसेच नवागत विद्यार्थिनींसाठी मिष्टान्न भोजनाची व्यवस्था करण्यात आल्याने प्रवेशोत्सवाला आनंददायी स्वरूप प्राप्त झाले.
देवळा तालुक्यातील पत्रकार सोमनाथ जगताप, संजय देवरे आणि महेश सोनकुळे यांचाही यावेळी यथोचित सन्मान करण्यात आला.
कार्यक्रमाचे प्रास्ताविक एस. एन. आहेर यांनी केले, तर के. एन. दातरे यांनी उपस्थितांचे आभार मानले. विद्यार्थिनी, पालक आणि शिक्षकांच्या उत्स्फूर्त सहभागामुळे हा कार्यक्रम यशस्वी आणि संस्मरणीय ठरला.
