प्रतिनिधी :
शिरोळ तालुक्यातील औरवाड हद्दीतील कृष्णा नदीच्या पाणवठ्यावर अज्ञात व्यक्तीचा मृतदेह आढळून आल्याने परिसरात खळबळ उडाली आहे. घटनेची माहिती मिळताच कुरुंदवाड पोलीस आणि ‘वजीर रेस्क्यू फोर्स’च्या जवानांनी तातडीने घटनास्थळी धाव घेत मृतदेह नदीपात्रातून बाहेर काढला.
मिळालेल्या माहितीनुसार, औरवाड पाणवठा परिसरात कृष्णा नदीच्या पाण्यात एक मृतदेह अडकून पडल्याचे स्थानिक नागरिकांच्या निदर्शनास आले. यानंतर औरवाडचे पोलीस पाटील यांनी तात्काळ कुरुंदवाड पोलीस ठाण्याशी संपर्क साधून घटनेची माहिती दिली.
घटनेचे गांभीर्य लक्षात घेऊन पोलिसांनी जिल्हा आपत्ती व्यवस्थापन कार्यात सक्रिय असलेल्या ‘वजीर रेस्क्यू फोर्स’च्या जवानांना पाचारण केले. माहिती मिळताच रेस्क्यू पथक घटनास्थळी दाखल झाले आणि अथक प्रयत्नांनंतर मृतदेह सुरक्षितपणे नदीतून बाहेर काढण्यात यश मिळवले.
यानंतर मृतदेह पुढील तपासासाठी कुरुंदवाड पोलिसांच्या ताब्यात देण्यात आला. सदर मृतदेह अज्ञात असल्याचे प्राथमिक माहितीतून समोर आले असून त्याची ओळख अद्याप पटलेली नाही.
कुरुंदवाड पोलीस ठाण्याचे अधिकारी या प्रकरणाचा अधिक तपास करत असून मृत व्यक्तीची ओळख पटविण्यासाठी प्रयत्न सुरू आहेत. दरम्यान, परिसरातील नागरिकांमध्ये या घटनेबाबत विविध चर्चांना उधाण आले आहे.
