नागापूर ग्रामपंचायत नवीन इमारतीचे भूमिपूजन उत्साहात संपन्न

परळी वैजनाथ तालुक्यातील नागापूर ग्रामपंचायतच्या नवीन इमारतीचे भूमिपूजन व पायाभरणी उद्घाटन सोहळा बुधवार, दि. 17 जून 2026 रोजी मोठ्या उत्साहात संपन्न झाला. गावच्या लोकप्रिय सरपंच सौ. मंगलताई रमेश तोंडारे, उपसरपंच संतोष भैय्या सोळंके, ग्रामपंचायत सदस्य, ज्येष्ठ नागरिक, युवक, पत्रकार, सामाजिक, राजकीय व शैक्षणिक क्षेत्रातील मान्यवरांच्या उपस्थितीत हा कार्यक्रम पार पडला.

गेल्या साठ वर्षांपासून जुन्या ग्रामपंचायत इमारतीतून गावाचा कारभार सुरू होता. मात्र इमारत मोडकळीस आल्याने ग्रामस्थांना तसेच कार्यालयीन कामकाजासाठी अनेक अडचणी निर्माण होत होत्या. नागरिकांसाठी बसण्याची योग्य व्यवस्था नसल्याने नवीन इमारतीची मागणी सातत्याने केली जात होती.

नागापूर ग्रामपंचायतीच्या पाठपुराव्यामुळे आणि माजी मंत्री Pankaja Munde यांच्या विशेष सहकार्याने “मा. बाळासाहेब ठाकरे मातोश्री ग्रामपंचायत बांधणी योजना” अंतर्गत नवीन इमारतीसाठी २५ लाख रुपयांचा निधी मंजूर करण्यात आला आहे.

या नवीन इमारतीमुळे ग्रामपंचायतीचे कामकाज अधिक सुकर होणार असून गावाच्या विकासाला चालना मिळणार असल्याची भावना ग्रामस्थांनी व्यक्त केली. साठ वर्षांनंतर नागापूरला नवीन ग्रामपंचायत इमारत मिळत असल्याने गावात आनंदाचे वातावरण निर्माण झाले आहे.

यावेळी नागनाथ देवस्थानचे सेक्रेटरी कुंडलिक वामनराव सोळंके, माणिकराव ज्ञानदेव सोळंके, अर्जुन यशवंतराव सोळंके, विकास मोहन बनसोडे, आरोग्य मित्र महादेव सोळंके, शिवाजी सोळंके यांच्यासह विविध क्षेत्रातील मान्यवर उपस्थित होते.

भारतीय दलित पॅंथर परळी तालुका अध्यक्ष तथा झाशीची राणी लक्ष्मीबाई सामाजिक प्रतिष्ठानच्या वतीने ग्रामपंचायत पदाधिकाऱ्यांचे अभिनंदन करण्यात आले. गावाच्या विकासासाठी भविष्यातही अशाच विविध योजना राबवाव्यात, अशा शुभेच्छाही यावेळी देण्यात आल्या.