मारेगाव, प्रतिनिधी :
मारेगाव तालुक्यातील चिंचोली बोटोनी सर्कल अंतर्गत जळका शिवारात अज्ञात इसमाचा मृतदेह आढळल्याने परिसरात एकच खळबळ उडाली होती. या घटनेची माहिती मिळताच मारेगाव पोलिसांनी तातडीने तपास सुरू करत अवघ्या दोन तासांत मृत व्यक्तीची ओळख पटविण्यात यश मिळवले आहे.
जळका येथील पोलीस पाटील मोघे यांनी घटनेची माहिती मारेगाव पोलीस स्टेशनला दिल्यानंतर पोलिस निरीक्षक सागर दानडे यांनी सहकाऱ्यांसह घटनास्थळी धाव घेतली. पंचनामा करून मृतदेह वैद्यकीय तपासणीसाठी मारेगाव ग्रामीण रुग्णालयात पाठविण्यात आला.
तपासादरम्यान मृत व्यक्तीची ओळख पांढरकवडा येथील रहिवासी राहुल जोशी (वय ४६) अशी पटली असल्याची माहिती पोलिसांनी दिली.
या प्रकरणाचा पुढील तपास पोलिस निरीक्षक सागर दानडे यांच्या मार्गदर्शनाखाली सहाय्यक पोलिस निरीक्षक रवी बुरकुळे, सहाय्यक पोलिस निरीक्षक दिगंबर किनाके तसेच पोलीस कर्मचारी नामदेव भटारकर, सागर दिपेवार आणि विकास खंडारे करीत आहेत.
मृत्यूचे नेमके कारण अद्याप स्पष्ट झाले नसून पोलिसांकडून विविध अंगांनी तपास सुरू असल्याची माहिती मिळत आहे.
