वर्धा, प्रतिनिधी :
मा. पोलीस अधीक्षक Saurabh Kumar Agrawal यांच्या अध्यक्षतेखाली स्कूल बस वाहतूक सुरक्षा समितीची महत्त्वपूर्ण बैठक पोलीस अधीक्षक कार्यालयात पार पडली. बैठकीला उपप्रादेशिक परिवहन अधिकारी मेंढे मॅडम, शिक्षण विभागाचे अधिकारी, वाहतूक असोसिएशनचे अध्यक्ष देवाभाऊ निखाडे तसेच विविध शाळांचे मुख्याध्यापक उपस्थित होते.
बैठकीत विद्यार्थ्यांच्या सुरक्षित वाहतुकीसंदर्भात विविध महत्त्वपूर्ण सूचना देण्यात आल्या. स्कूल बसमध्ये प्रथमोपचार पेटी, अग्निरोधक यंत्र तसेच आग विझविण्याचे प्रशिक्षण चालक व क्लिनर यांना असणे आवश्यक असल्याचे स्पष्ट करण्यात आले.
तसेच प्रत्येक स्कूल बसमध्ये सीसीटीव्ही कॅमेरे आणि जीपीएस यंत्रणा कार्यरत असावी, बसच्या आत व प्रवेशद्वारावर स्पष्ट दृश्य दिसेल याची दक्षता घेण्याचे निर्देश देण्यात आले. चालक व क्लिनर हे निर्व्यसनी, चांगल्या वर्तनाचे आणि वाहतूक नियमांचे पालन करणारे असावेत, असेही सांगण्यात आले.
विद्यार्थी वाहतुकीसाठी ऑटो रिक्षा व ई-रिक्षांना परवानगी नसल्याचे स्पष्ट करत विद्यार्थ्यांच्या सुरक्षेला सर्वोच्च प्राधान्य देण्याचे आवाहन करण्यात आले. प्रत्येक स्कूल बसमध्ये तक्रार पेटी आणि पोलीस हेल्पलाईन क्रमांक 112 लिहिण्याचे निर्देशही देण्यात आले.
आरटीओ अधिकारी आणि वाहतूक पोलीस नियमितपणे स्कूल बसची तपासणी करतील, तसेच बसची वेगमर्यादा नियंत्रित ठेवावी आणि अपघात टाळण्यासाठी शाळा प्रशासनाने विशेष दक्षता घ्यावी, असेही बैठकीत सांगण्यात आले.
वाहन चालवताना मोबाईलचा वापर करणे, मद्यप्राशन करून वाहन चालविणे यावर कठोर कारवाई करण्यात येणार असून आवश्यकतेनुसार वाहन परवाने निलंबित केले जातील, असा इशाराही यावेळी देण्यात आला.
